swang ab tark-e-mohabbat ka rachaya jae

svāñg ab tark-e-mohabbat kā rachāyā jaa.e

us ke pindār ko ā.īna dikhāyā jaa.e

vaz’-dārī-e-mohabbat ke munāfī hai to ho

aaj collar pe nayā phuul sajāyā jaa.e

she'r meñ tazkira-e-dasht-o-bayābāñ ho magar

ik baḌe shahr meñ ghar apnā basāyā jaa.e

balcony vo ka.ī din se hai vīrāñ yaaro

us galī meñ koī hangāma uThāyā jaa.e

sar ye kahtā hai gavārā nahīñ ab bārish-e-sang

dil ye kahtā hai usī kūche meñ jaayā jaa.e

ham hī pīchhe raheñ kyoñ dā’vā-e-jāñ-bāzī meñ

kyā zarūrī hai ki mar kar bhī dikhāyā jaa.e

shā'irī meñ na rahā jazba-o-ehsās ko daḳhl

ab ise qaum kī ḳhidmat pe lagāyā jaa.e

swang ab tark-e-mohabbat ka rachaya jae

us ke pindar ko aaina dikhaya jae

waz’-dari-e-mohabbat ke munafi hai to ho

aaj collar pe naya phul sajaya jae

she'r mein tazkira-e-dasht-o-bayaban ho magar

ek baDe shahr mein ghar apna basaya jae

balcony wo kai din se hai viran yaro

us gali mein koi hangama uThaya jae

sar ye kahta hai gawara nahin ab barish-e-sang

dil ye kahta hai usi kuche mein jaya jae

hum hi pichhe rahen kyon da’wa-e-jaan-bazi mein

kya zaruri hai ki mar kar bhi dikhaya jae

sha'iri mein na raha jazba-o-ehsas ko daKHl

ab ise qaum ki KHidmat pe lagaya jae