talluqat mein thoDa rachaw chahti hai

ta'alluqāt meñ thoḌā rachāv chāhtī hai

ye sard raat mirī jaañ alaav chāhtī hai

hameñ bhī ḳhizr ‘alaihis-salām kī hai talāsh

zarā sā 'aib hamārī bhī naav chāhtī hai

isī varaq pe mirā haath chhoḌnā hai tumheñ

isī varaq pe kahānī ghumāv chāhtī hai

hamārī shab ke añdheroñ ko biich meñ rakh kar

havā charāġh se sach-much banāv chāhtī hai

ye āñdhiyāñ to yahī dekhne nikaltī haiñ

shajar kī shāḳh kahāñ tak jhukāv chāhtī hai

vahī fareb kā ḳhanjar ho dosto lekin

bahādurī mire siine pe ghaav chāhtī hai

mire yaqīn ke qātil kī sādgī tauba

qusūr-vār bhī ho kar bachāv chāhtī hai

tasalliyoñ se koī fā.eda nahīñ hogā

hamārī choT masīhā bharāv chāhtī hai

mire khañDar hue dil meñ bhī shāhzādī sī

mirī ġhazal bhī bahut rakh-rakhāv chāhtī hai

kisī kī yaad meñ ‘misdāq-āzmī' aksar

hamārī aañkh nadī sā bahāv chāhtī hai

ta'alluqat mein thoDa rachaw chahti hai

ye sard raat meri jaan alaw chahti hai

hamein bhi KHizr ‘alaihis-salam ki hai talash

zara sa 'aib hamari bhi naw chahti hai

isi waraq pe mera hath chhoDna hai tumhein

isi waraq pe kahani ghumaw chahti hai

hamari shab ke andheron ko bich mein rakh kar

hawa charagh se sach-much banaw chahti hai

ye aandhiyan to yahi dekhne nikalti hain

shajar ki shaKH kahan tak jhukaw chahti hai

wahi fareb ka KHanjar ho dosto lekin

bahaduri mere sine pe ghaw chahti hai

mere yaqin ke qatil ki sadgi tauba

qusur-war bhi ho kar bachaw chahti hai

tasalliyon se koi faeda nahin hoga

hamari choT masiha bharaw chahti hai

mere khanDar hue dil mein bhi shahzadi si

meri ghazal bhi bahut rakh-rakhaw chahti hai

kisi ki yaad mein ‘misdaq-azmi' aksar

hamari aankh nadi sa bahaw chahti hai