ta-ba-kai tir pe o tir lagane wale

tā-ba-kai tiir pe o tiir lagāne vaale

dekh mar jaa.eñ na ye naaz uThāne vaale

jaan de dūñgā kahā maiñ ne to vo kahte haiñ

aise dekhe haiñ bahut jaan se jaane vaale

jis tarah apnī basar hotī hai ho jaatī hai

ḳhush raheñ shaad raheñ dil ke jalāne vaale

jazb-e-dil chāhe hai ulfat meñ asar ho sāhib

bin bulā.e hī chale aate haiñ aane vaale

shukr karte haiñ shikāyat kī jagah ham har baar

ham se kam hoñge tire jaur uThāne vaale

dard-o-ġham ranj-o-alam hairat-o-yās-o-hirmāñ

yahī mehmān to haiñ aa ke na jaane vaale

un ke kūche se maiñ guzrā to kahā shoḳhī se

kyoñ idhar aate haiñ sunte bhī ho jaane vaale

jaan dene ko haiñ tayyār 'jarīh'-e-muztar

tum ne dekhe nahīñ kyā naaz uThāne vaale

ta-ba-kai tir pe o tir lagane wale

dekh mar jaen na ye naz uThane wale

jaan de dunga kaha main ne to wo kahte hain

aise dekhe hain bahut jaan se jaane wale

jis tarah apni basar hoti hai ho jati hai

KHush rahen shad rahen dil ke jalane wale

jazb-e-dil chahe hai ulfat mein asar ho sahib

bin bulae hi chale aate hain aane wale

shukr karte hain shikayat ki jagah hum har bar

hum se kam honge tere jaur uThane wale

dard-o-gham ranj-o-alam hairat-o-yas-o-hirman

yahi mehman to hain aa ke na jaane wale

un ke kuche se main guzra to kaha shoKHi se

kyon idhar aate hain sunte bhi ho jaane wale

jaan dene ko hain tayyar 'jarih'-e-muztar

tum ne dekhe nahin kya naz uThane wale