ta-hadd-e-nazar koi makan hai na makin hai

tā-hadd-e-nazar koī makāñ hai nā makīñ hai

dil vaqt ke maqtūl fasānoñ kī zamīñ hai

aurāq-e-bahārāñ ko phir ik baar ulaT kar

dekho to sahī naam hamārā bhī kahīñ hai

is tarah bhaTaktā huuñ akelā hī akelā

jaise ye mirā shahr mirā shahr nahīñ hai

jalte haiñ charāġhoñ kī tarah ġham ke añdhere

jab se mire hamrāh koī sho.ala-jabīñ hai

har samt zamāne kī vahī dhuul hai lekin

har shakl tire pyaar kī dil-dār-o-hasīñ hai

chhā.ī haiñ jahāñ zulf-e-mo.ambar kī ghaTā.eñ

shāyad mire gītoñ kā nayā des vahīñ hai

yādoñ ke shabistāñ se bulātā nahīñ koī

ḳhvāboñ ke darīche meñ koī sham.a nahīñ hai

tū aur bhī rāhoñ se mirī duur huā hai

tū aur bhī mujh se mire gītoñ se qarīñ hai

sadiyoñ se isī tarh bhaTaktī hai ḳhudā.ī

sadiyoñ se isī tarh ḳhudā arsh-nashīñ hai

hālāt ke baḌhte hue pathrāv meñ 'jāmī'

kuchh aur mujhe azmat-e-hastī kā yaqīñ hai

ta-hadd-e-nazar koi makan hai na makin hai

dil waqt ke maqtul fasanon ki zamin hai

auraq-e-bahaaran ko phir ek bar ulaT kar

dekho to sahi nam hamara bhi kahin hai

is tarah bhaTakta hun akela hi akela

jaise ye mera shahr mera shahr nahin hai

jalte hain charaghon ki tarah gham ke andhere

jab se mere hamrah koi shoala-jabin hai

har samt zamane ki wahi dhul hai lekin

har shakl tere pyar ki dil-dar-o-hasin hai

chhai hain jahan zulf-e-moambar ki ghaTaen

shayad mere giton ka naya des wahin hai

yaadon ke shabistan se bulata nahin koi

KHwabon ke dariche mein koi shama nahin hai

tu aur bhi rahon se meri dur hua hai

tu aur bhi mujh se mere giton se qarin hai

sadiyon se isi tarh bhaTakti hai KHudai

sadiyon se isi tarh KHuda arsh-nashin hai

haalat ke baDhte hue pathraw mein 'jami'

kuchh aur mujhe azmat-e-hasti ka yaqin hai