ta-subh sari raat wo rahti hai ashk-bar

tā-sub.h saarī raat vo rahtī hai ashk-bār

shabnam kisī ke ġham meñ abhī tak hai sogvār

aatā hai rāste meñ nazar jab kabhī-kabhār

dekhe hai ajnabī kī tarah mujh ko bār-bār

lamhe meñ ek rāz-e-mohabbat ko paḌh liyā

ik roz ittifāq se āñkheñ huī thiiñ chaar

mānind-e-qais narġha-e-vahshat meñ ghir gayā

sahrā meñ kyoñ bagūla uḌātā rahā ġhubār

shīrīñ se bhiik lene meñ qāsir hai tīsha-gar

hāthoñ meñ aable haiñ to jholī hai tār-tār

thī rasm-e-ruḳhsatī yā janāza thā dosh par

shānoñ pe kuchh uThā.e hue aadmī the chaar

jab chhoḌ kar chalā gayā vo jān-e-gulsitāñ

ab kyā karegī aa ke chaman meñ mire bahār

'shāhid' hai us ke bas meñ mirī maut aur hayāt

chāhe rihā.ī de de yā le jaa.e sū-e-dār

ta-subh sari raat wo rahti hai ashk-bar

shabnam kisi ke gham mein abhi tak hai sogwar

aata hai raste mein nazar jab kabhi-kabhaar

dekhe hai ajnabi ki tarah mujh ko bar-bar

lamhe mein ek raaz-e-mohabbat ko paDh liya

ek roz ittifaq se aankhen hui thin chaar

manind-e-qais nargha-e-wahshat mein ghir gaya

sahra mein kyon bagula uData raha ghubar

shirin se bhik lene mein qasir hai tisha-gar

hathon mein aable hain to jholi hai tar-tar

thi rasm-e-ruKHsati ya janaza tha dosh par

shanon pe kuchh uThae hue aadmi the chaar

jab chhoD kar chala gaya wo jaan-e-gulsitan

ab kya karegi aa ke chaman mein mere bahaar

'shahid' hai us ke bas mein meri maut aur hayat

chahe rihai de de ya le jae su-e-dar