ta-umr jo nahin tha KHudara nahin bana

tā-umr jo nahīñ thā ḳhudārā nahīñ banā

patthar tarāsh kar bhī maiñ tujh sā nahīñ banā

kashtī se ek aañkh talak maiñ hī maiñ thā bas

parde meñ zindagī rakhī pardā nahīñ banā

maiñ hī banā huuñ paanī maiñ hī aag kā bhañvar

maiñ uljhā apne aap se to kyā nahīñ banā

ḳhud ko kabhī bhī bāñdh ke rakkhā nahīñ kahīñ

taqsīm ho gayā huuñ sahīfa nahīñ banā

maiñ ġham-zada shikasta-dil-o-nā-tavāñ sahī

marzī se khel khelā hai mohra nahīñ banā

gar ḳhud-kushī pe aa gayā to ābshār huuñ

har samt se hasīn huuñ girya nahīñ banā

hosh-o-havās meñ kiyā gar ishq bhī kiyā

sahrā-navardī meñ bhī tamāsha nahīñ banā

bad-qismatī ke taaj tire sar pe ā.eñge

'sayyad' kisī ke haath pe naqshā nahīñ banā

ta-umr jo nahin tha KHudara nahin bana

patthar tarash kar bhi main tujh sa nahin bana

kashti se ek aankh talak main hi main tha bas

parde mein zindagi rakhi parda nahin bana

main hi bana hun pani main hi aag ka bhanwar

main uljha apne aap se to kya nahin bana

KHud ko kabhi bhi bandh ke rakkha nahin kahin

taqsim ho gaya hun sahifa nahin bana

main gham-zada shikasta-dil-o-na-tawan sahi

marzi se khel khela hai mohra nahin bana

gar KHud-kushi pe aa gaya to aabshaar hun

har samt se hasin hun girya nahin bana

hosh-o-hawas mein kiya gar ishq bhi kiya

sahra-nawardi mein bhi tamasha nahin bana

bad-qismati ke taj tere sar pe aaenge

'sayyad' kisi ke hath pe naqsha nahin bana