tazim aarti ki hai aadar azan ka hai

tā'zīm aartī kī hai aadar azaañ kā hai

duniyā meñ ye kamāl to hindostāñ kā hai

gandī siyāsatoñ ne bahāroñ ko khā liyā

mausam hamāre gaañv meñ ab bhī ḳhizāñ kā hai

nāhaq hī dushmanoñ ko ye ilzām de diyā

gulshan ujāḌne kā jatan bāġhbāñ kā hai

tum zalzaloñ ke ḳhauf se vāqif nahīñ rahe

itnā ġhurūr aaj ye ūñche makāñ kā hai

'unvān jo hamārī kahānī kā thā kabhī

kirdār ab vo aur kisī dāstāñ kā hai

'arshad' nahīñ hai koī gila ġhair se hameñ

ġhaddār hai to koī isī kārvāñ kā hai

ta'zim aarti ki hai aadar azan ka hai

duniya mein ye kamal to hindostan ka hai

gandi siyasaton ne bahaaron ko kha liya

mausam hamare ganw mein ab bhi KHizan ka hai

nahaq hi dushmanon ko ye ilzam de diya

gulshan ujaDne ka jatan baghban ka hai

tum zalzalon ke KHauf se waqif nahin rahe

itna ghurur aaj ye unche makan ka hai

'unwan jo hamari kahani ka tha kabhi

kirdar ab wo aur kisi dastan ka hai

'arshad' nahin hai koi gila ghair se hamein

ghaddar hai to koi isi karwan ka hai