tab-e-furqat bhi nahin zabt ka yara bhi nahin

tāb-e-furqat bhī nahīñ zabt kā yaarā bhī nahīñ

use ghabrā ke bhulā deñ ye gavārā bhī nahīñ

ḳhud-farebī se tirā lutf jise kah sakte

apnī qismat meñ vo mub.ham sā ishārā bhī nahīñ

mauj-e-sāhil hī Dubo detī to kyā kahnā thā

vo safīna jise tūfāñ kā sahārā bhī nahīñ

vaa.e taqdīr-e-mohabbat kabhī aate jaate

tū ne dekhā bhī nahīñ ham ne pukārā bhī nahīñ

itne mānūs haiñ ab shaam kī tanhā.ī se

ġham ke māroñ ko tirā qurb gavārā bhī nahīñ

munharif tere taġhāful se sabhī haiñ lekin

terā ġham chhoḌ ke duniyā meñ guzārā bhī nahīñ

kyā huā chashm-e-karam ruuTh ga.ī ai 'māhir'

dil magar gardish-e-ayyām se haarā bhī nahīñ

tab-e-furqat bhi nahin zabt ka yara bhi nahin

use ghabra ke bhula den ye gawara bhi nahin

KHud-farebi se tera lutf jise kah sakte

apni qismat mein wo mubham sa ishaara bhi nahin

mauj-e-sahil hi Dubo deti to kya kahna tha

wo safina jise tufan ka sahaara bhi nahin

wae taqdir-e-mohabbat kabhi aate jate

tu ne dekha bhi nahin hum ne pukara bhi nahin

itne manus hain ab sham ki tanhai se

gham ke maron ko tera qurb gawara bhi nahin

munharif tere taghaful se sabhi hain lekin

tera gham chhoD ke duniya mein guzara bhi nahin

kya hua chashm-e-karam ruTh gai ai 'mahir'

dil magar gardish-e-ayyam se haara bhi nahin