tabani-e-ruKH le kar tum samne jab aae

tābānī-e-ruḳh le kar tum sāmne jab aa.e

mahsūs huā aisā ham chāñd se Takrā.e

barkhā kā ye mausam bhī kis darja suhānā hai

aahoñ kī idhar badlī zulfoñ ke udhar saa.e

āgāh na the pahle ham ishq kī rāhoñ se

phūloñ ke ishāroñ par kāñToñ meñ chale aa.e

hoñToñ ke tabassum par sau bijliyāñ raqsāñ haiñ

bikhrāte haiñ vo sho.ale dāman koī phailā.e

ālām-e-zamāna se badlā huuñ maiñ kis had tak

maiñ apne ko pahchānūñ ā.īna koī laa.e

ai dost mujhe tujh se ik daur kī nisbat hai

tārīk mirī rāteñ gesū tire kajlā.e

ye gul bhī haiñ dāġh-e-dil hai farq 'salām' itnā

kuchh rah ga.e gulshan meñ kuchh dil meñ chale aa.e

tabani-e-ruKH le kar tum samne jab aae

mahsus hua aisa hum chand se Takrae

barkha ka ye mausam bhi kis darja suhana hai

aahon ki idhar badli zulfon ke udhar sae

aagah na the pahle hum ishq ki rahon se

phulon ke ishaaron par kanTon mein chale aae

honTon ke tabassum par sau bijliyan raqsan hain

bikhraate hain wo shoale daman koi phailae

aalam-e-zamana se badla hun main kis had tak

main apne ko pahchanun aaina koi lae

ai dost mujhe tujh se ek daur ki nisbat hai

tarik meri raaten gesu tere kajlae

ye gul bhi hain dagh-e-dil hai farq 'salam' itna

kuchh rah gae gulshan mein kuchh dil mein chale aae