tairan-e-KHush-gulu sab zamzama-pardaz hain

tā.irān-e-ḳhush-gulū sab zamzama-pardāz haiñ

aap bhī kuchh boliye ham gosh-bar-āvāz haiñ

muddatoñ pahle vatan chhoḌā thā rozī ke liye

har taraf hālāt ab to aur bhī nā-sāz haiñ

laḌ rahā hai ik akelā shaḳhs zulm-o-jabr se

yuuñ to kahne ko bahut se aur bhī jāñbāz haiñ

haq diyā jaatā nahīñ puurā kisī mazdūr ko

aise istehsāl ke lākhoñ yahāñ andāz haiñ

sciencī tahqīq aksar hairatoñ meñ gum huī

māvarā-e-‘aql qudrat ke hazāroñ raaz haiñ

mere baare meñ to vo kuchh jānte tak bhī nahīñ

jin ko ye dā'vā rahā hai vo mire dam-sāz haiñ

aap to mā'sūmiyat meñ baat dil kī kah ga.e

aap kyā jāneñ ki kitne log fitna-bāz haiñ

baa'd meñ karnā zarā zaḳhmī parindoñ kā ḳhayāl

vo parinde kar rihā jo qabil-e-parvāz haiñ

ban ke 'azrā' rah ga.ī huuñ maiñ khulī koī kitāb

she'r mere sab mire jazbāt ke ġhammāz haiñ

tairan-e-KHush-gulu sab zamzama-pardaz hain

aap bhi kuchh boliye hum gosh-bar-awaz hain

muddaton pahle watan chhoDa tha rozi ke liye

har taraf haalat ab to aur bhi na-saz hain

laD raha hai ek akela shaKHs zulm-o-jabr se

yun to kahne ko bahut se aur bhi jaanbaz hain

haq diya jata nahin pura kisi mazdur ko

aise istehsal ke lakhon yahan andaz hain

scienci tahqiq aksar hairaton mein gum hui

mawara-e-‘aql qudrat ke hazaron raaz hain

mere bare mein to wo kuchh jaante tak bhi nahin

jin ko ye da'wa raha hai wo mere dam-saz hain

aap to ma'sumiyat mein baat dil ki kah gae

aap kya jaanen ki kitne log fitna-baz hain

ba'd mein karna zara zaKHmi parindon ka KHayal

wo parinde kar riha jo qabil-e-parwaz hain

ban ke 'azra' rah gai hun main khuli koi kitab

she'r mere sab mere jazbaat ke ghammaz hain