talab dariya jhil samundar nahin hue

tālāb dariyā jhiil samundar nahīñ hue

us kī nigāh-e-nāz se baḌh kar nahīñ hue

kab se ḳhudā samajh ke jise pūjte rahe

us kī nazar ke saa.e bhī ham par nahīñ hue

sar se na ek shaḳhs kā nashsha utar sakā

so ham nashe meñ dhut kabhī pī kar nahīñ hue

jitne udaas ham tujhe kho kar hue haiñ aaj

itne to ḳhush kabhī tujhe pā kar nahīñ hue

tū jis taraf bhī jaa.e udhar chal paḌeñge dost

ham tere saath soch samajh kar nahīñ hue

duniyā tulī thī ham ko banāne pe devtā

par ham kisī bhī haal meñ patthar nahīñ hue

talab dariya jhil samundar nahin hue

us ki nigah-e-naz se baDh kar nahin hue

kab se KHuda samajh ke jise pujte rahe

us ki nazar ke sae bhi hum par nahin hue

sar se na ek shaKHs ka nashsha utar saka

so hum nashe mein dhut kabhi pi kar nahin hue

jitne udas hum tujhe kho kar hue hain aaj

itne to KHush kabhi tujhe pa kar nahin hue

tu jis taraf bhi jae udhar chal paDenge dost

hum tere sath soch samajh kar nahin hue

duniya tuli thi hum ko banane pe dewta

par hum kisi bhi haal mein patthar nahin hue