talluqat ke zaKHmon ka hun sataya hua

ta'alluqāt ke zaḳhmoñ kā huuñ satāyā huā

jo shaam aa.ī mirā saaya bhī parāyā huā

miTegā zehn se kab terī yaad kā afsūñ

hazār sadiyoñ se ye bojh hai uThāyā huā

vo ek shaḳhs abhī dil meñ chhup ke baiThā hai

vo shaḳhs jo kabhī apnā kabhī parāyā huā

har ek lamhe kī aahaT pe dil laraztā hai

zamāne bhar ko ho jaise gale lagāyā huā

na.ī rutoñ kī huā ne 'ajīb sāzish kī

ki mauj-e-ḳhūñ meñ hai har barg-e-gul nahāyā huā

kisī ke saañs kī āvāz tak nahīñ aatī

sukūt-e-marg ne pahra hai vo biThāyā huā

har ik nazar meñ koī ajnabī sī aahaT hai

har ek dil meñ koī ḳhauf hai samāyā huā

vo tīrgī hai ki āñkhoñ meñ ik kiran bhī nahīñ

vo ḳhāmushī hai ki lamhoñ ne zahr khāyā huā

maiñ apne vaqt ke zindāñ kā ek qaidī huuñ

nazar nazar hai fasīloñ ne sar uThāyā huā

gurez-pā hai vo umr-e-azīz kī mānind

hai ek 'umr se apnā jise banāyā huā

na koī yaar na hamdam na koī hamrāhī

tumhārī zulf kā saaya to ḳhair saaya huā

ta'alluqat ke zaKHmon ka hun sataya hua

jo sham aai mera saya bhi paraya hua

miTega zehn se kab teri yaad ka afsun

hazar sadiyon se ye bojh hai uThaya hua

wo ek shaKHs abhi dil mein chhup ke baiTha hai

wo shaKHs jo kabhi apna kabhi paraya hua

har ek lamhe ki aahaT pe dil larazta hai

zamane bhar ko ho jaise gale lagaya hua

nai ruton ki hua ne 'ajib sazish ki

ki mauj-e-KHun mein hai har barg-e-gul nahaya hua

kisi ke sans ki aawaz tak nahin aati

sukut-e-marg ne pahra hai wo biThaya hua

har ek nazar mein koi ajnabi si aahaT hai

har ek dil mein koi KHauf hai samaya hua

wo tirgi hai ki aankhon mein ek kiran bhi nahin

wo KHamushi hai ki lamhon ne zahr khaya hua

main apne waqt ke zindan ka ek qaidi hun

nazar nazar hai fasilon ne sar uThaya hua

gurez-pa hai wo umr-e-aziz ki manind

hai ek 'umr se apna jise banaya hua

na koi yar na hamdam na koi hamrahi

tumhaari zulf ka saya to KHair saya hua