talluqat ki har rasm ko sula dega

ta.alluqāt kī har rasm ko sulā degā

ḳhabar na thī ki vahī aag ko havā degā

kisī bhī ġhair ko fursat kahāñ Thaharne kī

jo zaḳhm degā mujhe merā āshnā degā

isī liye kabhī iz.hār maiñ nahīñ kartā

vo aarzū ko mirī aa.ina dikhā degā

sukūn bikhrā huā dekh kar jo baiTh bhī jā.ūñ

ḳhamosh jhiil meñ patthar koī girā degā

sharar jo hausla-e-dil kā ban gayā sho.ala

gulāb rāhguzar par mirī bichhā degā

jahāñ pe chāhā hai us ne vahīñ Thahar gayā huuñ

kahāñ qiyām hai merā vahī pata degā

ye vaqt aisā hī zālim hai 'nūr' mat pūchho

mujhe ḳhabar thī mirā naqsh tak miTā degā

talluqat ki har rasm ko sula dega

KHabar na thi ki wahi aag ko hawa dega

kisi bhi ghair ko fursat kahan Thaharne ki

jo zaKHm dega mujhe mera aashna dega

isi liye kabhi izhaar main nahin karta

wo aarzu ko meri aaina dikha dega

sukun bikhra hua dekh kar jo baiTh bhi jaun

KHamosh jhil mein patthar koi gira dega

sharar jo hausla-e-dil ka ban gaya shoala

gulab rahguzar par meri bichha dega

jahan pe chaha hai us ne wahin Thahar gaya hun

kahan qiyam hai mera wahi pata dega

ye waqt aisa hi zalim hai 'nur' mat puchho

mujhe KHabar thi mera naqsh tak miTa dega