tamir ka sauda hai na taKHrib ka Dar hai

ta.amīr kā saudā hai na taḳhrīb kā Dar hai

ye dasht to lagtā hai ki majnūñ kā nagar hai

ye mo.ajiza is ijz-e-basārat ne dikhāyā

aflāk nahīñ haiñ ye mirī hadd-e-nazar hai

Duubā huuñ magar sail-e-zamāñ meñ nahīñ Duubā

girdāb hai jazbāt kā sochoñ kā bhañvar hai

ḳhuuñ piine lagā dekhiye insān kā insān

allāh qayāmat hai ye allāh hazar hai

maujūd kī har chiiz hai yuuñ bhī tah-o-bālā

kyā ālam-e-imkān bhī ab zer-o-zabar hai

jaane hī nahīñ dete kahīñ dā.ere mujh ko

maiñ sochtā rahtā huuñ safar hai ki hazar hai

is shiddat-e-zulmat meñ jo zāhir hai ufuq par

umīd-e-sahar hai ki ye tanvīr-e-sahar hai

jo kuchh bhī guzartī hai zamīñ vāloñ pe guzre

vaa.iz kī to bas ālam-e-bālā pe nazar hai

tamir ka sauda hai na taKHrib ka Dar hai

ye dasht to lagta hai ki majnun ka nagar hai

ye moajiza is ijz-e-basarat ne dikhaya

aflak nahin hain ye meri hadd-e-nazar hai

Duba hun magar sail-e-zaman mein nahin Duba

girdab hai jazbaat ka sochon ka bhanwar hai

KHun pine laga dekhiye insan ka insan

allah qayamat hai ye allah hazar hai

maujud ki har chiz hai yun bhi tah-o-baala

kya aalam-e-imkan bhi ab zer-o-zabar hai

jaane hi nahin dete kahin daere mujh ko

main sochta rahta hun safar hai ki hazar hai

is shiddat-e-zulmat mein jo zahir hai ufuq par

umid-e-sahar hai ki ye tanwir-e-sahar hai

jo kuchh bhi guzarti hai zamin walon pe guzre

waiz ki to bas aalam-e-baala pe nazar hai