tar-e-nigah-e-lutf se pahle rafu karen

tār-e-nigāh-e-lutf se pahle rafū kareñ

phir mere zaḳhm-e-dil kī davā chāra-jū kareñ

kab tak talāsh-e-yār meñ paanī lahū kareñ

milnā hai jab muhāl to kyā justujū kareñ

phir un se arz-e-hāl kī kuchh aarzū kareñ

pahle dil-o-jigar ko jab apne lahū kareñ

jis ne kabhī kiyā na ho ka.aba kī samt ruḳh

marne pe kyā zarūr use qibla-rū kareñ

pahle vo dil meñ soch leñ anjām kyā huā

luknat pe phir kalīm kī kuchh guftugū kareñ

aise hī be-ḳhulūs ke hai dostī harām

jaise ki ham namāz adā be-vuzū kareñ

rindoñ ke saath piinā pilānā hai nā-guzīr

phir kyuuñ na ham bhī bai.at-e-dast-e-subū kareñ

donoñ ke donoñ ḳhanjar-e-ġham se haiñ chaak chaak

dil ko rafū kareñ ki jigar ko rafū kareñ

'sho.ala' na phir kisī se kisī ko gila rahe

ham ek dūsre kī agar aabrū kareñ

tar-e-nigah-e-lutf se pahle rafu karen

phir mere zaKHm-e-dil ki dawa chaara-ju karen

kab tak talash-e-yar mein pani lahu karen

milna hai jab muhaal to kya justuju karen

phir un se arz-e-haal ki kuchh aarzu karen

pahle dil-o-jigar ko jab apne lahu karen

jis ne kabhi kiya na ho kaba ki samt ruKH

marne pe kya zarur use qibla-ru karen

pahle wo dil mein soch len anjam kya hua

luknat pe phir kalim ki kuchh guftugu karen

aise hi be-KHulus ke hai dosti haram

jaise ki hum namaz ada be-wuzu karen

rindon ke sath pina pilana hai na-guzir

phir kyun na hum bhi baiat-e-dast-e-subu karen

donon ke donon KHanjar-e-gham se hain chaak chaak

dil ko rafu karen ki jigar ko rafu karen

'shoala' na phir kisi se kisi ko gila rahe

hum ek dusre ki agar aabru karen