tare khile hue hain shab-e-mahtab hai

taare khile hue haiñ shab-e-māhtāb hai

ma.ashūq ham-piyāla hai bazm-e-sharāb hai

ye kyā sitam hai vasl meñ muñh par naqāb hai

qurbān is hayā ke ye kaisā hijāb hai

baiThe ho mere sāmne pahlū meñ ġhair ke

phir mujh se pūchhte ho tumheñ kyuuñ itaab hai

ye faiz hai mire araq-e-infi.āl kā

nār-e-jahīm mere liye aab aab hai

tasvīr-e-ġhair bhej ke us ne ba-laff-e-ḳhat

unvāñ ye likh diyā tire ḳhat kā javāb hai

kyuuñ chheḌte haiñ mujh ko nakīrain qabr meñ

jo so rahā ho us ko jagānā azaab hai

is ke bhī mustahiq nahīñ aġhyār nā-ba-kār

gaalī bhī aap deñ to vo durr-e-ḳhushāb hai

mujh ko nahīñ hai sham.a kī hājat sar-e-mazār

merā har ek dāġh-e-jigar āftāb hai

tum to faroġh-e-husn meñ bar-ḳhud ġhalat rahe

maiñ ne na kah diyā thā ye dhoka hai ḳhvāb hai

ka.aba jo ik butoñ kā purānā maqām thā

zāhid vahāñ ke shauq meñ pādar-rikāb hai

bhūle hue ho ahd-e-javānī pe kis liye

is se to pā.edār ziyāda habāb hai

rusvā mire kiye se na hogā vo hashr meñ

us kā sharīk ye dil-e-ḳhāna-ḳharāb hai

phande meñ phañs gayā dil-e-nādāñ hazār haif

kis ko ḳhabar thī zulf tumhārī tanāb hai

kyuuñ tum ne mere ḳhat ke parḳhache uḌā diye

nārāz ho to mujh se ho mujh par itaab hai

ham ko nahīñ hai jis lab-e-nāzuk se faiz kuchh

ho vo jo ḳhush-numā.ī meñ barg-e-gulāb hai

mutrib ne raag chheḌā hai aa kar shab-e-firāq

kyā dil-ḳharāsh naġhma-e-chañg-o-rabāb hai

'rāsiḳh' milā hai apnī riyāzat kā phal mujhe

naḳhl-e-suḳhan jo aaj mirā bāryāb hai

tare khile hue hain shab-e-mahtab hai

mashuq ham-piyala hai bazm-e-sharab hai

ye kya sitam hai wasl mein munh par naqab hai

qurban is haya ke ye kaisa hijab hai

baiThe ho mere samne pahlu mein ghair ke

phir mujh se puchhte ho tumhein kyun itab hai

ye faiz hai mere araq-e-infial ka

nar-e-jahim mere liye aab aab hai

taswir-e-ghair bhej ke us ne ba-laff-e-KHat

unwan ye likh diya tere KHat ka jawab hai

kyun chheDte hain mujh ko nakirain qabr mein

jo so raha ho us ko jagana azab hai

is ke bhi mustahiq nahin aghyar na-ba-kar

gali bhi aap den to wo durr-e-KHushab hai

mujh ko nahin hai shama ki hajat sar-e-mazar

mera har ek dagh-e-jigar aaftab hai

tum to farogh-e-husn mein bar-KHud ghalat rahe

main ne na kah diya tha ye dhoka hai KHwab hai

kaba jo ek buton ka purana maqam tha

zahid wahan ke shauq mein padar-rikab hai

bhule hue ho ahd-e-jawani pe kis liye

is se to paedar ziyaada habab hai

ruswa mere kiye se na hoga wo hashr mein

us ka sharik ye dil-e-KHana-KHarab hai

phande mein phans gaya dil-e-nadan hazar haif

kis ko KHabar thi zulf tumhaari tanab hai

kyun tum ne mere KHat ke parKHache uDa diye

naraaz ho to mujh se ho mujh par itab hai

hum ko nahin hai jis lab-e-nazuk se faiz kuchh

ho wo jo KHush-numai mein barg-e-gulab hai

mutrib ne rag chheDa hai aa kar shab-e-firaq

kya dil-KHarash naghma-e-chang-o-rabab hai

'rasiKH' mila hai apni riyazat ka phal mujhe

naKHl-e-suKHan jo aaj mera baryab hai