tarik zindagi ko banane laga hai wo

tārīk zindagī ko banāne lagā hai vo

sūraj se raushnī ko churāne lagā hai vo

likh likh ke mere naam aziyyat ke dasht-o-dar

jāgīr mere ġham kī baḌhāne lagā hai vo

ehsās kī salīb liye chal rahā huuñ maiñ

dasht-e-junūñ meñ shor machāne lagā hai vo

mujh se hī le ke mere salīqe kī raushnī

tahzīb kī zabān sikhāne lagā hai vo

taḳhlīq-e-kā.enāt kā gar maiñ sabab rahā

phir kyuuñ mirā vaqār ghaTāne lagā hai vo

parvardigār merī shahādat qubūl kar

talvār le ke sāmne aane lagā hai vo

'ḳhālid' maiñ us ke haath kī tahrīr thā magar

harf-e-ġhalat samajh ke miTāne lagā hai vo

tarik zindagi ko banane laga hai wo

suraj se raushni ko churane laga hai wo

likh likh ke mere nam aziyyat ke dasht-o-dar

jagir mere gham ki baDhane laga hai wo

ehsas ki salib liye chal raha hun main

dasht-e-junun mein shor machane laga hai wo

mujh se hi le ke mere saliqe ki raushni

tahzib ki zaban sikhane laga hai wo

taKHliq-e-kaenat ka gar main sabab raha

phir kyun mera waqar ghaTane laga hai wo

parwardigar meri shahadat qubul kar

talwar le ke samne aane laga hai wo

'KHalid' main us ke hath ki tahrir tha magar

harf-e-ghalat samajh ke miTane laga hai wo