tarikiyon ke baad numud-e-sahar bhi ho

tārīkiyoñ ke baad numūd-e-sahar bhī ho

ik sub.h-e-bā-jamāl ḳhudāyā idhar bhī ho

hoñ chār-sū bahāroñ ke mausam saje hue

girvīda koī phūloñ kī chashm-e-bashar bhī ho

ġhunchoñ kī būd-o-bāsh se rahtā ho bā-ḳhabar

duzdīda-e-nazar bhī ho aur dīda-var bhī ho

jo rok de ḳhizāñ ke thapeḌe chaman se duur

sāya-fagan guloñ pe ghanerā shajar bhī ho

bahte samundaroñ kī satah par na jaa.e vo

dekhe jo zer-e-āb bhī chāhe bhañvar bhī ho

haiñ zer-e-āb saare ḳhazīne chhupe hue

dekhe jo zer-e-ḳhāk kuchh aisī nazar bhī ho

vo tez-o-tund dhāroñ meñ bahne ke bāvajūd

is bahr-e-be-karāñ kī vo rakhtā ḳhabar bhī ho

siipī se motī chun ke dikhā.e 'adā' koī

jauhar-shanās ho koī ahl-e-hunar bhī ho

tarikiyon ke baad numud-e-sahar bhi ho

ek subh-e-ba-jamal KHudaya idhar bhi ho

hon chaar-su bahaaron ke mausam saje hue

girwida koi phulon ki chashm-e-bashar bhi ho

ghunchon ki bud-o-bash se rahta ho ba-KHabar

duzdida-e-nazar bhi ho aur dida-war bhi ho

jo rok de KHizan ke thapeDe chaman se dur

saya-fagan gulon pe ghanera shajar bhi ho

bahte samundaron ki satah par na jae wo

dekhe jo zer-e-ab bhi chahe bhanwar bhi ho

hain zer-e-ab sare KHazine chhupe hue

dekhe jo zer-e-KHak kuchh aisi nazar bhi ho

wo tez-o-tund dhaaron mein bahne ke bawajud

is bahr-e-be-karan ki wo rakhta KHabar bhi ho

sipi se moti chun ke dikhae 'ada' koi

jauhar-shanas ho koi ahl-e-hunar bhi ho