tarikiyon mein apni ziya chhoD jaunga

tārīkiyoñ meñ apnī ziyā chhoḌ jā.ūñgā

guzrūñgā maiñ to naqsh-e-vafā chhoḌ jā.ūñgā

duniyā ke log sunte raheñge tamām 'umr

lafzoñ meñ apne dil kī sadā chhoḌ jā.ūñgā

apne lahū se phuul khilā kar hayāt ke

har samt ḳhushbuoñ kī fazā chhoḌ jā.ūñgā

rakheñgī yaad husn kī ra.anā.iyāñ mujhe

vo gulsitāñ meñ rañg nayā chhoḌ jā.ūñgā

har ik qadam banegī jo tahzīb kī misāl

vo zindagī kī tarz-e-adā chhoḌ jā.ūñgā

sīñchegā phir chaman meñ use mere baa'd kaun

jis peḌ ko yahāñ maiñ harā chhoḌ jā.ūñgā

ye sochtā huuñ jab kabhī hogā mirā safar

kyā kyā maiñ le ke jā.ūñgā kyā chhoḌ jā.ūñgā

tarke meñ kuchh bhī chhoḌūñ na chhoḌūñ yahāñ magar

bachchoñ ke haq meñ apnī du'ā chhoḌ jā.ūñgā

pahuñchegā faiz jis se zamāne ko ai 'guhar'

ilm-o-hunar kī maiñ vo ghaTā chhoḌ jā.ūñgā

tarikiyon mein apni ziya chhoD jaunga

guzrunga main to naqsh-e-wafa chhoD jaunga

duniya ke log sunte rahenge tamam 'umr

lafzon mein apne dil ki sada chhoD jaunga

apne lahu se phul khila kar hayat ke

har samt KHushbuon ki faza chhoD jaunga

rakhengi yaad husn ki ranaiyan mujhe

wo gulsitan mein rang naya chhoD jaunga

har ek qadam banegi jo tahzib ki misal

wo zindagi ki tarz-e-ada chhoD jaunga

sinchega phir chaman mein use mere ba'd kaun

jis peD ko yahan main hara chhoD jaunga

ye sochta hun jab kabhi hoga mera safar

kya kya main le ke jaunga kya chhoD jaunga

tarke mein kuchh bhi chhoDun na chhoDun yahan magar

bachchon ke haq mein apni du'a chhoD jaunga

pahunchega faiz jis se zamane ko ai 'guhar'

ilm-o-hunar ki main wo ghaTa chhoD jaunga