tarikiyon mein ek diya mangte hain hum

tārīkiyoñ meñ ek diyā māñgte haiñ ham

apne lahū kā ḳhūn-bahā māñgte haiñ ham

kuchh beTiyoñ ke baap nahīñ mil rahe yahāñ

maaoñ ke lāDloñ kā patā māñgte haiñ ham

ham pūchhte haiñ masḳh-shuda mayyatoñ ke naam

gum-karda sāthiyoñ kī ḳhatā māñgte haiñ ham

tum shauq se barahna phiro hākimān-e-vaqt

apne liye to band-e-qabā māñgte haiñ ham

ham māñgte haiñ jism chhupāne ko ik kafan

sar Dhāñpne ko ek ridā māñgte haiñ ham

tū mudda'ī hai terī samā'at chalī ga.ī

chhīnī ga.ī hamārī sadā māñgte haiñ ham

in zulmatoñ ke habs meñ ghuTne lagā hai dam

thoḌī fasīl-e-jāñ meñ havā māñgte haiñ ham

kyā tum ne lashkaroñ ke havādis nahīñ sune

phir ḳhāmushī se ek du'ā māñgte haiñ ham

phir aa liyā hai lashkar-e-fir'aun ne hameñ

'hammād' aaj phir se 'asā māñgte haiñ ham

tarikiyon mein ek diya mangte hain hum

apne lahu ka KHun-baha mangte hain hum

kuchh beTiyon ke bap nahin mil rahe yahan

maon ke laDlon ka pata mangte hain hum

hum puchhte hain masKH-shuda mayyaton ke nam

gum-karda sathiyon ki KHata mangte hain hum

tum shauq se barahna phiro hakiman-e-waqt

apne liye to band-e-qaba mangte hain hum

hum mangte hain jism chhupane ko ek kafan

sar Dhanpne ko ek rida mangte hain hum

tu mudda'i hai teri sama'at chali gai

chhini gai hamari sada mangte hain hum

in zulmaton ke habs mein ghuTne laga hai dam

thoDi fasil-e-jaan mein hawa mangte hain hum

kya tum ne lashkaron ke hawadis nahin sune

phir KHamushi se ek du'a mangte hain hum

phir aa liya hai lashkar-e-fir'aun ne hamein

'hammad' aaj phir se 'asa mangte hain hum