tarikiyon mein nur ka ya-rab guzar na ho

tārīkiyoñ meñ nuur kā yā-rab guzar na ho

merī vo shaam ho jo rahīn-e-sahar na ho

maiñ sirf intizār-e-rah-e-yār hī rahūñ

merī shab-e-firāq kabhī muḳhtasar na ho

be-rah-ravī kī manzil-e-āvārgāñ meñ bhī

thak jā.ūñ to talāsh-e-rah-o-rāhbar na ho

gum-karda-rāh ho ke bhaTaktā hī maiñ rahūñ

ġhurbat kī shaam meñ bhī rafīq-e-safar na ho

shajar-e-hayāt bāġh-e-jahāñ meñ hamārī tarh

qat’a-o-burīd dahr se yuuñ be-samar na ho

kyoñ vaqf-e-sad-alam na hoñ anfās-e-musta.ār

kyoñ jāñ-setāñ mire liye marg-e-pisar na ho

begāna-vār ho ke maiñ apne vajūd se

pahuñchūñ vahīñ jahāñ mujhe apnī ḳhabar na ho

mehmāñ huuñ chand din kā go ai shām-e-be-kasī

mashq-e-sitam meñ tere magar kuchh kasar na ho

tū aa harīm-e-nāz se ai husn-e-sho.ala-pāsh

mujh ko vo aañkh de jise tāb-e-nazar na ho

logoñ kī har duā to ho maqbūl-e-bārgāh

merī ik āh-e-nīm-shabī meñ asar na ho

kahte haiñ ik jahāñ jise mardān-e-ḳhud-fareb

hangāma-āfrīnī-e-shām-o-sahar na ho

jis ne kiyā hai darham-o-barham nizām-e-dahr

yā-rab kisī kī vo nigah-e-fitna-gar na ho

jāñ-kandanī meñ bhī na ho koī sharīk-e-hāl

mar jā.ūñ bhī to paas koī nauhagar na ho

mayyat ke saath saath farishtoñ kā ho hujūm

insāñ koī sharīk-e-janāza magar na ho

aa.e na ba.ad-e-dafn kahīñ sub.h-e-bāz-purs

shām-e-murād merī kahīñ muḳhtasar na ho

kyūñkar ho kāmyāb jahān-e-ḳharāb meñ

tab.a-e-hazīn-o-zār meñ himmat agar na ho

jannat kī aarzū meñ ye taa.at abas hai shaiḳh

shāyad kisī ke fazl pe ye munhasir na ho

har zarra rashk-e-tūr nazar aa rahā hai jo

hotā hai ye gumāñ ki fareb-e-nazar na ho

ho nūr-e-imbisāt se har shaḳhs bahra-var

yā-rab jahāñ meñ koī bhī zulmat-basar na ho

har naqsh-e-pā ko dekh ke jhuk jaatī hai jabīñ

ye jaan kar kahīñ vo tirī rahguzar na ho

parvāz-e-ja.afrī ho atā merī na.ash ko

merā janāza uTh ke kahīñ bār-e-sar na ho

jin ko hai vāsta mirī jān-e-azīz se

barbādiyoñ kī mere unheñ kuchh ḳhabar na ho

āsāñ ho rāh-e-zīst to gir-paḌ ke ek din

dushvār to yahī hai ki dushvār-tar na ho

mabzūl us ke rahm-o-karam ko jo kar sake

'mehdī' vo aah merī ho jo be-asar na ho

tarikiyon mein nur ka ya-rab guzar na ho

meri wo sham ho jo rahin-e-sahar na ho

main sirf intizar-e-rah-e-yar hi rahun

meri shab-e-firaq kabhi muKHtasar na ho

be-rah-rawi ki manzil-e-awargan mein bhi

thak jaun to talash-e-rah-o-rahbar na ho

gum-karda-rah ho ke bhaTakta hi main rahun

ghurbat ki sham mein bhi rafiq-e-safar na ho

shajar-e-hayat bagh-e-jahan mein hamari tarh

qat’a-o-burid dahr se yun be-samar na ho

kyon waqf-e-sad-alam na hon anfas-e-mustaar

kyon jaan-setan mere liye marg-e-pisar na ho

begana-war ho ke main apne wajud se

pahunchun wahin jahan mujhe apni KHabar na ho

mehman hun chand din ka go ai sham-e-be-kasi

mashq-e-sitam mein tere magar kuchh kasar na ho

tu aa harim-e-naz se ai husn-e-shoala-pash

mujh ko wo aankh de jise tab-e-nazar na ho

logon ki har dua to ho maqbul-e-bargah

meri ek aah-e-nim-shabi mein asar na ho

kahte hain ek jahan jise mardan-e-KHud-fareb

hangama-afrini-e-sham-o-sahar na ho

jis ne kiya hai darham-o-barham nizam-e-dahr

ya-rab kisi ki wo nigah-e-fitna-gar na ho

jaan-kandani mein bhi na ho koi sharik-e-haal

mar jaun bhi to pas koi nauhagar na ho

mayyat ke sath sath farishton ka ho hujum

insan koi sharik-e-janaza magar na ho

aae na baad-e-dafn kahin subh-e-baz-purs

sham-e-murad meri kahin muKHtasar na ho

kyunkar ho kaamyab jahan-e-KHarab mein

taba-e-hazin-o-zar mein himmat agar na ho

jannat ki aarzu mein ye taat abas hai shaiKH

shayad kisi ke fazl pe ye munhasir na ho

har zarra rashk-e-tur nazar aa raha hai jo

hota hai ye guman ki fareb-e-nazar na ho

ho nur-e-imbisat se har shaKHs bahra-war

ya-rab jahan mein koi bhi zulmat-basar na ho

har naqsh-e-pa ko dekh ke jhuk jati hai jabin

ye jaan kar kahin wo teri rahguzar na ho

parwaz-e-jafri ho ata meri nash ko

mera janaza uTh ke kahin bar-e-sar na ho

jin ko hai wasta meri jaan-e-aziz se

barbaadiyon ki mere unhen kuchh KHabar na ho

aasan ho rah-e-zist to gir-paD ke ek din

dushwar to yahi hai ki dushwar-tar na ho

mabzul us ke rahm-o-karam ko jo kar sake

'mehdi' wo aah meri ho jo be-asar na ho