tarikiyon mein nur sa phaila rahe hain hum

tārīkiyoñ meñ nuur sā phailā rahe haiñ ham

zarroñ ko kā.enāt ke chamkā rahe haiñ ham

samjho to āsmāñ kī bulandī bhī kuchh nahīñ

socho to kis kā naqsh-e-kaf-e-pā rahe haiñ ham

aañsū gire ki ġham kī amānat chhalak ga.ī

iz.hār-e-ġham ke saath hī pachhtā rahe haiñ ham

ai kaash zindagī ko mayassar ho lutf-e-dīd

ab tak asīr-e-va.ada-e-fardā rahe haiñ ham

ai ahd-e-nau ye silsila-e-jaur tā-kujā

kab se hayāt-e-shauq ko bahlā rahe haiñ ham

ham se na vo mile kabhī un se na ham mile

yuuñ misl-e-rang-o-bū sadā yakjā rahe haiñ ham

zīnat luġhat kī harf-e-haqīqat hai ai 'zamīr'

bātil kā har fareb-e-hasīñ khā rahe haiñ ham

tarikiyon mein nur sa phaila rahe hain hum

zarron ko kaenat ke chamka rahe hain hum

samjho to aasman ki bulandi bhi kuchh nahin

socho to kis ka naqsh-e-kaf-e-pa rahe hain hum

aansu gire ki gham ki amanat chhalak gai

izhaar-e-gham ke sath hi pachhta rahe hain hum

ai kash zindagi ko mayassar ho lutf-e-did

ab tak asir-e-wada-e-farda rahe hain hum

ai ahd-e-nau ye silsila-e-jaur ta-kuja

kab se hayat-e-shauq ko bahla rahe hain hum

hum se na wo mile kabhi un se na hum mile

yun misl-e-rang-o-bu sada yakja rahe hain hum

zinat lughat ki harf-e-haqiqat hai ai 'zamir'

baatil ka har fareb-e-hasin kha rahe hain hum