taron ki jhamakti baadh tale aankhon mein raat guzari hai

tāroñ kī jhamaktī baaḌh tale āñkhoñ meñ raat guzārī hai

aur aaTh minute kī duurī par sūraj kī zard amārī hai

gardūñ pe kamandeñ Daal chuke ḳhurshīd uchhālā neze par

imkān kī sarhad paar huī ab aage kī tayyārī hai

table kī gat lahrātī hai kāfūrī sham'oñ kī lau par

aur nīma-e-shab ke mahzar meñ sangat ko ik darbārī hai

mustaqbil ke sayyāre par kuchh sāhib-e-amr mashīñ-zāde

masrūf haiñ kār-e-duniyā meñ aur apne liye bekārī hai

bāzār chaḌhā to saudāgar ḳhvāboñ ke buġhche bāñdh chale

raste meñ magar shab-ḳhūn paḌā shamshīr ajal ne maarī hai

jis kāran des bides laḌe lashkar payāde sālār javāñ

qasbātī qahba-ḳhāne kī lachkīlī sī bhatiyārī hai

īmān aur sabr kī vaadī se jannat kī taraf jaanā thā magar

kuchh īmāñ kī kamzorī hai kuchh sabr kā patthar bhārī hai

gar vaqt kā dhārā TuuT gayā phir mahfil-e-hast-o-būd kahāñ

bahte hue dariyā par tū ne kyā soch ke lāThī maarī hai

taron ki jhamakti baDh tale aankhon mein raat guzari hai

aur aaTh minute ki duri par suraj ki zard amari hai

gardun pe kamanden Dal chuke KHurshid uchhaala neze par

imkan ki sarhad par hui ab aage ki tayyari hai

table ki gat lahraati hai kafuri sham'on ki lau par

aur nima-e-shab ke mahzar mein sangat ko ek darbari hai

mustaqbil ke sayyare par kuchh sahib-e-amr mashin-zade

masruf hain kar-e-duniya mein aur apne liye bekari hai

bazar chaDha to saudagar KHwabon ke bughche bandh chale

raste mein magar shab-KHun paDa shamshir ajal ne mari hai

jis karan des bides laDe lashkar payaade salar jawan

qasbaati qahba-KHane ki lachkili si bhatiyari hai

iman aur sabr ki wadi se jannat ki taraf jaana tha magar

kuchh iman ki kamzori hai kuchh sabr ka patthar bhaari hai

gar waqt ka dhaara TuT gaya phir mahfil-e-hast-o-bud kahan

bahte hue dariya par tu ne kya soch ke laThi mari hai