tayyun ki hadon mein jalwa-saman ho nahin sakta

ta.ayyun kī hadoñ meñ jalva-sāmāñ ho nahīñ saktā

vo husn-e-kul muhīt-e-kufr-o-īmāñ ho nahīñ saktā

jo pāmāl-e-ḳhirām-e-nāz-e-jānāñ ho nahīñ saktā

vo madfan hāsil-e-gor-e-ġharībāñ ho nahīñ saktā

ise rahne de yūñhī baḳhiya-gar tū is kī hālat par

rafū jis kā ho vo merā girebāñ ho nahīñ saktā

milegī daad mahshar meñ vo zālim mil nahīñ saktā

kahīñ bhī mere dard-e-dil kā darmāñ ho nahīñ saktā

ye qaid-e-lā-makāñ kaisī ye taḳhsīs-e-makāñ kyā hai

tirā jalva muhīt-e-hadd-e-imkāñ ho nahīñ saktā

nahīñ jab aarzū koī to ḳhūn-e-ārzū kaisā

dil-e-be-mudda.ā nākām-e-armāñ ho nahīñ saktā

bhañvar meñ jitnā Dūbegā ye utnā aur ubhregā

mohabbat kā safīna ġharq-e-tūfāñ ho nahīñ saktā

use kyā āzmā.egī tajallī barq-e-aiman kī

jo un kā dekhne vaalā hai hairāñ ho nahīñ saktā

vo ashk-e-ġham na surḳhī jis meñ ḳhūn-e-dil kī shāmil ho

mire afsāna-e-ulfat kā unvāñ ho nahīñ saktā

tabī.at hī badal dī lazzat-e-āzār-e-paiham ne

vo chāheñ bhī to mere ġham kā darmāñ ho nahīñ saktā

mirī hastī hijāb-e-rū-e-jānāñ kyoñ ho ai 'afqar'

mirī hastī kā parda rū-e-jānāñ ho nahīñ saktā

tayyun ki hadon mein jalwa-saman ho nahin sakta

wo husn-e-kul muhit-e-kufr-o-iman ho nahin sakta

jo pamal-e-KHiram-e-naz-e-jaanan ho nahin sakta

wo madfan hasil-e-gor-e-ghariban ho nahin sakta

ise rahne de yunhi baKHiya-gar tu is ki haalat par

rafu jis ka ho wo mera gireban ho nahin sakta

milegi dad mahshar mein wo zalim mil nahin sakta

kahin bhi mere dard-e-dil ka darman ho nahin sakta

ye qaid-e-la-makan kaisi ye taKHsis-e-makan kya hai

tera jalwa muhit-e-hadd-e-imkan ho nahin sakta

nahin jab aarzu koi to KHun-e-arzu kaisa

dil-e-be-muddaa nakaam-e-arman ho nahin sakta

bhanwar mein jitna Dubega ye utna aur ubhrega

mohabbat ka safina gharq-e-tufan ho nahin sakta

use kya aazmaegi tajalli barq-e-aiman ki

jo un ka dekhne wala hai hairan ho nahin sakta

wo ashk-e-gham na surKHi jis mein KHun-e-dil ki shamil ho

mere afsana-e-ulfat ka unwan ho nahin sakta

tabiat hi badal di lazzat-e-azar-e-paiham ne

wo chahen bhi to mere gham ka darman ho nahin sakta

meri hasti hijab-e-ru-e-jaanan kyon ho ai 'afqar'

meri hasti ka parda ru-e-jaanan ho nahin sakta