taza ho dimagh apna tamanna hai to ye hai

taaza ho dimāġh apnā tamannā hai to ye hai

us zulf kī bū sūñghiye saudā hai to ye hai

qaiñchī nahīñ chalvā.ī mire naama ne kis par

parvār kabūtar ho jo anqā hai to ye hai

kuchh sarv kā rutba hī nahīñ qad se tire past

shamshād-o-sanobar se bhī baalā hai to ye hai

miltā jo nahīñ yaar to ham bhī nahīñ milte

ġhairat kā ab apne bhī taqāzā hai to ye hai

ai nūr-e-nazar mo.ajaza-e-husn se tere

andhe bhī kaheñge ki masīhā hai to ye hai

mahshar ko bhī dīdār kā parda na kare yaar

āshiq ko jo andesha-e-fardā hai to ye hai

biinā hoñ jo āñkheñ to ruḳh-e-yār ko dekheñ

nazzāra ke qābil jo tamāshā hai to ye hai

mazmūñ dahan-e-yār kā kyā fikr se nikle

lā-hal jo mo.ammoñ meñ muammā hai to ye hai

gah yād-e-sanam dil meñ hai gah yād-e-ilāhī

ka.aba hai to ye hai jo kalīsā hai to ye hai

ma.ashūq o mai o ḳhāna-e-ḳhālī o shab-e-māh

āshiq ke liye hāsil-e-duniyā hai to ye hai

dīvāne na kyūñ-kar ḳhal-o-zanjīr pahante

sarkār-e-junūñ kā jo sarāpā hai to ye hai

dil ke liye hai ishq to dil ishq kī ḳhātir

mai hai to ye hai aur jo miinā hai to ye hai

dīvāna-e-qad ke kabhī nāloñ ko to suniye

hañgāma-e-mahshar kā sā ġhauġhā hai to ye hai

sābit dahan-e-yār dalīloñ se kar 'ātish'

hujjat kī jo shā.er ke liye jā hai to ye hai

taza ho dimagh apna tamanna hai to ye hai

us zulf ki bu sunghiye sauda hai to ye hai

qainchi nahin chalwai mere nama ne kis par

parwar kabutar ho jo anqa hai to ye hai

kuchh sarw ka rutba hi nahin qad se tere past

shamshad-o-sanobar se bhi baala hai to ye hai

milta jo nahin yar to hum bhi nahin milte

ghairat ka ab apne bhi taqaza hai to ye hai

ai nur-e-nazar moajaza-e-husn se tere

andhe bhi kahenge ki masiha hai to ye hai

mahshar ko bhi didar ka parda na kare yar

aashiq ko jo andesha-e-farda hai to ye hai

bina hon jo aankhen to ruKH-e-yar ko dekhen

nazzara ke qabil jo tamasha hai to ye hai

mazmun dahan-e-yar ka kya fikr se nikle

la-hal jo moammon mein muamma hai to ye hai

gah yaad-e-sanam dil mein hai gah yaad-e-ilahi

kaba hai to ye hai jo kalisa hai to ye hai

mashuq o mai o KHana-e-KHali o shab-e-mah

aashiq ke liye hasil-e-duniya hai to ye hai

diwane na kyun-kar KHal-o-zanjir pahante

sarkar-e-junun ka jo sarapa hai to ye hai

dil ke liye hai ishq to dil ishq ki KHatir

mai hai to ye hai aur jo mina hai to ye hai

diwana-e-qad ke kabhi nalon ko to suniye

hangama-e-mahshar ka sa ghaugha hai to ye hai

sabit dahan-e-yar dalilon se kar 'atish'

hujjat ki jo shaer ke liye ja hai to ye hai