tab bhi jazbon mein ye hi shiddat thi

tab bhī jazboñ meñ ye hī shiddat thī

jab yahāñ raat aur vahshat thī

haa.e jo luT ga.ī hai ḳhvāhish meñ

yaar vo ruuh nek-sīrat thī

zindagī se gila nahīñ koī

zindagī vāris-e-aziyyat thī

aur bātoñ kā ham ko kyā mā'lūm

haañ magar aap se mohabbat thī

aur koī nahīñ thā merā vahāñ

bas tirī yaad hī se nisbat thī

aa.ine meñ bhī ek aa.ina thā

yā'nī sūrat meñ ek sūrat thī

is liye bhī uḌaan bhar na sakī

ḳhaak se is badan ko dahshat thī

aur kuchh kab thā in ḳhayāloñ meñ

ik jahannum thā ek jannat thī

tab bhi jazbon mein ye hi shiddat thi

jab yahan raat aur wahshat thi

hae jo luT gai hai KHwahish mein

yar wo ruh nek-sirat thi

zindagi se gila nahin koi

zindagi waris-e-aziyyat thi

aur baaton ka hum ko kya ma'lum

han magar aap se mohabbat thi

aur koi nahin tha mera wahan

bas teri yaad hi se nisbat thi

aaine mein bhi ek aaina tha

ya'ni surat mein ek surat thi

is liye bhi uDan bhar na saki

KHak se is badan ko dahshat thi

aur kuchh kab tha in KHayalon mein

ek jahannum tha ek jannat thi