tab safha-safha kaisa khula ja raha tha main

tab saf.ha-saf.ha kaisā khulā jā rahā thā maiñ

tum chhū rahī thī aur jalā jā rahā thā maiñ

phir vāpsī pe duur se dekhā tirī taraf

dekhā tirī taraf ko chalā jā rahā thā maiñ

maiñ ro rahā thā aur dhulī jā rahī thiiñ tum

tum ro rahī thiiñ aur dhulā jā rahā thā maiñ

itnī sakat kahāñ thī ki ḳhud ko rafū karūñ

kuchh dostoñ ke hāthoñ silā jā rahā thā maiñ

lahreñ to māntī thiiñ kināra mujhe magar

kaT-kaT ke ḳhud nadī meñ milā jā rahā thā maiñ

chhū chhū ke hāthoñ-hāth guzārā gayā mujhe

Thahre hue the log Talā jā rahā thā maiñ

maiñ qatra-e-sukūñ kī tarāvaT se Dar gayā

kaisī namī huī thī galā jā rahā thā maiñ

shatranj-e-zindagī meñ ajab uljhaneñ rahīñ

merī muḳhālifat meñ chalā jā rahā thā maiñ

vo to bhalā ho mujh ko ḳhizāñ ne jagā diyā

varna kisī gumāñ meñ khulā jā rahā thā maiñ

sab chāhte the mere vasīle se ho sahar

ḳhvāhish mirī bhī thī pa Dhalā jā rahā thā maiñ

tab safha-safha kaisa khula ja raha tha main

tum chhu rahi thi aur jala ja raha tha main

phir wapsi pe dur se dekha teri taraf

dekha teri taraf ko chala ja raha tha main

main ro raha tha aur dhuli ja rahi thin tum

tum ro rahi thin aur dhula ja raha tha main

itni sakat kahan thi ki KHud ko rafu karun

kuchh doston ke hathon sila ja raha tha main

lahren to manti thin kinara mujhe magar

kaT-kaT ke KHud nadi mein mila ja raha tha main

chhu chhu ke hathon-hath guzara gaya mujhe

Thahre hue the log Tala ja raha tha main

main qatra-e-sukun ki tarawaT se Dar gaya

kaisi nami hui thi gala ja raha tha main

shatranj-e-zindagi mein ajab uljhanen rahin

meri muKHalifat mein chala ja raha tha main

wo to bhala ho mujh ko KHizan ne jaga diya

warna kisi guman mein khula ja raha tha main

sab chahte the mere wasile se ho sahar

KHwahish meri bhi thi pa Dhala ja raha tha main