tab se wafa ka tazkira gunge ka KHwab ho gaya

tab se vafā kā tazkira gūñge kā ḳhvāb ho gayā

jab se maiñ dil-ba-dar huā ḳhāna-ḳharāb ho gayā

paa.e nigāh aa lage jab lab-e-manzil-e-talab

āñkheñ pur-āb ho ga.iiñ dariyā sarāb ho gayā

apne jahāz le ke tab aa.e jahāz-rān kab

merā jazīra-e-vajūd jab tah-e-āb ho gayā

chashm-e-vazīr-e-mumlikat us pe huī jo mehrbāñ

tab se vo nañg-e-shahr bhī ālī-janāb ho gayā

haa.e mirī jabīn se sajde ke daaġh dhul ga.e

sar pe paḌā huā thā jo saaya sahāb ho gayā

jab se hamāre haath se chhīnā butoñ ne iḳhtiyār

apnā sanam-kadoñ meñ rahnā azaab ho gayā

tab se wafa ka tazkira gunge ka KHwab ho gaya

jab se main dil-ba-dar hua KHana-KHarab ho gaya

pae nigah aa lage jab lab-e-manzil-e-talab

aankhen pur-ab ho gain dariya sarab ho gaya

apne jahaz le ke tab aae jahaz-ran kab

mera jazira-e-wajud jab tah-e-ab ho gaya

chashm-e-wazir-e-mumlikat us pe hui jo mehrban

tab se wo nang-e-shahr bhi aali-janab ho gaya

hae meri jabin se sajde ke dagh dhul gae

sar pe paDa hua tha jo saya sahab ho gaya

jab se hamare hath se chhina buton ne iKHtiyar

apna sanam-kadon mein rahna azab ho gaya