tabiat-e-be-niyaz-e-josh-e-wahshat ho to sakti hai

tabī.at-e-be-niyāz-e-josh-e-vahshat ho to saktī hai

jo tum chāho to behtar merī hālat ho to saktī hai

vo dil lene chale haiñ ik nigāh-e-nāz ke badle

chalo us jins kī bhī koī qīmat ho to saktī hai

nahīñ ahl-e-vafā kī qadr terī bazm meñ lekin

kabhī in sarfaroshoñ kī zarūrat ho to saktī hai

duā.eñ māñgte the sub.h-e-nau kī ye na sochā thā

kabhī sub.h-e-vatan bhī shām-e-ġhurbat ho to saktī hai

ye maanā kārobār-e-zindagī qaa.em hai nafrat par

magar insāñ ko insāñ se mohabbat ho to saktī hai

ye maiñ ne kab kahā merī tarah tum ko mohabbat hai

magar merī tarah tum ko mohabbat ho to saktī hai

chale haiñ ruuTh kar kuchh riñd mai-ḳhāne se ai 'maikash'

yahī āzurdagī azm-e-baġhāvat ho to saktī hai

tabiat-e-be-niyaz-e-josh-e-wahshat ho to sakti hai

jo tum chaho to behtar meri haalat ho to sakti hai

wo dil lene chale hain ek nigah-e-naz ke badle

chalo us jins ki bhi koi qimat ho to sakti hai

nahin ahl-e-wafa ki qadr teri bazm mein lekin

kabhi in sarfaroshon ki zarurat ho to sakti hai

duaen mangte the subh-e-nau ki ye na socha tha

kabhi subh-e-watan bhi sham-e-ghurbat ho to sakti hai

ye mana karobar-e-zindagi qaem hai nafrat par

magar insan ko insan se mohabbat ho to sakti hai

ye main ne kab kaha meri tarah tum ko mohabbat hai

magar meri tarah tum ko mohabbat ho to sakti hai

chale hain ruTh kar kuchh rind mai-KHane se ai 'maikash'

yahi aazurdagi azm-e-baghawat ho to sakti hai