tabiat jab meri aamada-e-tadbir hoti hai

tabī.at jab mirī āmāda-e-tadbīr hotī hai

karam-farmā hamesha shūmī-e-taqdīr hotī hai

kahīñ rusvā.iyoñ se ibtidā hī meñ na Dar jaanā

mohabbat rafta rafta bā.is-e-tauqīr hotī hai

mujhe inkār kyā hai un se ḳhud jā kar bhī milne meñ

dil-e-ḳhuddār kahtā hai mirī tahqīr hotī hai

takabbur se kahīñ ai dil use zaa.e.a na kar denā

baḌī mushkil se paidā aah meñ tāsīr hotī hai

tire ḳhat ko mulāqāt-e-mukammal kyuuñ na maiñ samjhūñ

tirī tahrīr meñ bhī lazzat-e-taqrīr hotī hai

uḌā jaatā hai dāman har kisī kā dhajjiyāñ ho kar

havas kuchh is tarah duniyā meñ dāman-gīr hotī hai

tirī tasvīr bhī kuchh kam nahīñ hai dil-farebī meñ

ḳhamoshī meñ bhī kyā kyā shoḳhī-e-taqrīr hotī hai

vahī merī sī ḳhāmoshī vahī merī sī hairānī

tirī tasvīr se paidā mirī tasvīr hotī hai

ise kahte haiñ 'sāhir' husn kī rūdād bhī lekin

ġhazal apnī hamesha ishq kī tafsīr hotī hai

tabiat jab meri aamada-e-tadbir hoti hai

karam-farma hamesha shumi-e-taqdir hoti hai

kahin ruswaiyon se ibtida hi mein na Dar jaana

mohabbat rafta rafta bais-e-tauqir hoti hai

mujhe inkar kya hai un se KHud ja kar bhi milne mein

dil-e-KHuddar kahta hai meri tahqir hoti hai

takabbur se kahin ai dil use zaea na kar dena

baDi mushkil se paida aah mein tasir hoti hai

tere KHat ko mulaqat-e-mukammal kyun na main samjhun

teri tahrir mein bhi lazzat-e-taqrir hoti hai

uDa jata hai daman har kisi ka dhajjiyan ho kar

hawas kuchh is tarah duniya mein daman-gir hoti hai

teri taswir bhi kuchh kam nahin hai dil-farebi mein

KHamoshi mein bhi kya kya shoKHi-e-taqrir hoti hai

wahi meri si KHamoshi wahi meri si hairani

teri taswir se paida meri taswir hoti hai

ise kahte hain 'sahir' husn ki rudad bhi lekin

ghazal apni hamesha ishq ki tafsir hoti hai