tabiat mein ye sarshaari kahan se aa gai hai

tabī.at meñ ye sarshārī kahāñ se aa ga.ī hai

abhī achchhe the bīmārī kahāñ se aa ga.ī hai

kabhī dogānā paḌhte the namāz-e-ishq ham tum

ab is rishte meñ begārī kahāñ se aa ga.ī hai

zalīl-o-ḳhvār nā-hanjār pyāre kam-nasībo

tumhāre sar meñ sardārī kahāñ se aa ga.ī hai

ye mahfil ḳhūbsūrat ḳhūb-sīrat dostoñ kī

yahāñ ik shakl sarkārī kahāñ se aa ga.ī hai

lahad se duur haiñ zinda haiñ phir bhī mere aage

lahad kī chār-dīvārī kahāñ se aa ga.ī hai

bahut dushvār thā āsān karnā mas.aloñ kā

ab āsānī meñ dushvārī kahāñ se aa ga.ī hai

jo hāzir aur nāzir hai vo raavī likh rahā hai

hamāre ghar azā-dārī kahāñ se aa ga.ī hai

'anīs'-e-nā-tavāñ kyā pūchhte haiñ jān-e-jāñ se

ki in sheroñ meñ be-zārī kahāñ se aa ga.ī hai

tabiat mein ye sarshaari kahan se aa gai hai

abhi achchhe the bimari kahan se aa gai hai

kabhi dogana paDhte the namaz-e-ishq hum tum

ab is rishte mein begari kahan se aa gai hai

zalil-o-KHwar na-hanjar pyare kam-nasibo

tumhaare sar mein sardari kahan se aa gai hai

ye mahfil KHubsurat KHub-sirat doston ki

yahan ek shakl sarkari kahan se aa gai hai

lahad se dur hain zinda hain phir bhi mere aage

lahad ki chaar-diwari kahan se aa gai hai

bahut dushwar tha aasan karna masalon ka

ab aasani mein dushwari kahan se aa gai hai

jo hazir aur nazir hai wo rawi likh raha hai

hamare ghar aza-dari kahan se aa gai hai

'anis'-e-na-tawan kya puchhte hain jaan-e-jaan se

ki in sheron mein be-zari kahan se aa gai hai