tabsira shahr ke haalat par ijmali hai

tabsira shahr ke hālāt par ijmālī hai

she'r kahtā huuñ ki shā'ir kī jagah ḳhālī hai

us ke chehre ke ujāloñ kī tamanna hai bahut

hijr kī raat hai aur raat baḌī kaalī hai

kisī ‘īsā-nafasī kī mujhe ḳhvāhish bhī nahīñ

maiñ ne jab pyaar se bīmārī-e-dil paalī hai

phuul ke din bhī nahīñ aur mahaktā hai daraḳht

patte jhaḌte haiñ magar baaġh meñ hariyālī hai

koī mausam ho jhapaktī hī nahīñ vo āñkheñ

ki unhīñ āñkhoñ ke zimme mirī rakhvālī hai

kaun ban-bās ke din kaaT ke ghar aayā hai

gaañv kī suunī muñDeroñ pe bhī dīvālī hai

chāhatoñ se kise inkār sazā kuchh bhī sahī

dil-e-majbūr kā ye jurm to iqbālī hai

āḳhirash maiñ ne banā hī liyā DeḌh iiñT kā ghar

haa.e zālim ne bhī kyā shoḳh tarah Daalī hai

sirf lahja nahīñ bandish meñ bhī chustī hai 'ra.īs'

jaise māhir ko ġhazal aap ne dikhlā lī hai

tabsira shahr ke haalat par ijmali hai

she'r kahta hun ki sha'ir ki jagah KHali hai

us ke chehre ke ujalon ki tamanna hai bahut

hijr ki raat hai aur raat baDi kali hai

kisi ‘isa-nafasi ki mujhe KHwahish bhi nahin

main ne jab pyar se bimari-e-dil pali hai

phul ke din bhi nahin aur mahakta hai daraKHt

patte jhaDte hain magar bagh mein hariyali hai

koi mausam ho jhapakti hi nahin wo aankhen

ki unhin aankhon ke zimme meri rakhwali hai

kaun ban-bas ke din kaT ke ghar aaya hai

ganw ki suni munDeron pe bhi diwali hai

chahaton se kise inkar saza kuchh bhi sahi

dil-e-majbur ka ye jurm to iqbaali hai

aaKHirash main ne bana hi liya DeDh inT ka ghar

hae zalim ne bhi kya shoKH tarah Dali hai

sirf lahja nahin bandish mein bhi chusti hai 'rais'

jaise mahir ko ghazal aap ne dikhla li hai