taDap jata hai dil jab duriyon ki baat hoti hai

taḌap jaatā hai dil jab dūriyoñ kī baat hotī hai

idhar sūraj nikaltā hai udhar jab raat hotī hai

kabhī ik baat hotī hai hazāroñ baat ke pīchhe

kabhī ik baat ke andar hazāroñ baat hotī hai

maqām-e-'adl se guzre dayār-e-sidq bhī dekhā

har ik 'ālam meñ duniyā ahl-e-zar ke saath hotī hai

yahāñ zālim nahīñ koī to bārish kyoñ nahīñ hotī

idhar barsāt hotī hai udhar barsāt hotī hai

mukammal taur par ham sāmne aane se Darte haiñ

hamārī asl hālat to pas-e-hālāt hotī hai

haq-o-bātil azal se barsar-e-paikār haiñ lekin

na is kī jiit hotī hai na us kī maat hotī hai

bagūloñ kī jagah ugtī haiñ ḳhud-rau jhāḌiyāñ aksar

‘arab ke reg-zāroñ meñ bhī ab barsāt hotī hai

mire har kaam kā maqsad hai 'irfān' us kī ḳhushnūdī

mirī har fikr kā mehvar usī kī zaat hotī hai

taDap jata hai dil jab duriyon ki baat hoti hai

idhar suraj nikalta hai udhar jab raat hoti hai

kabhi ek baat hoti hai hazaron baat ke pichhe

kabhi ek baat ke andar hazaron baat hoti hai

maqam-e-'adl se guzre dayar-e-sidq bhi dekha

har ek 'alam mein duniya ahl-e-zar ke sath hoti hai

yahan zalim nahin koi to barish kyon nahin hoti

idhar barsat hoti hai udhar barsat hoti hai

mukammal taur par hum samne aane se Darte hain

hamari asl haalat to pas-e-haalat hoti hai

haq-o-baatil azal se barsar-e-paikar hain lekin

na is ki jit hoti hai na us ki mat hoti hai

bagulon ki jagah ugti hain KHud-rau jhaDiyan aksar

‘arab ke reg-zaron mein bhi ab barsat hoti hai

mere har kaam ka maqsad hai 'irfan' us ki KHushnudi

meri har fikr ka mehwar usi ki zat hoti hai