taDapne ki ijazat jazba-e-bismil se milti hai

taḌapne kī ijāzat jazba-e-bismil se miltī hai

jo dil mushtāq ho to phir zarā mushkil se miltī hai

vo haq sach kī ibārat paḌhne se mahrūm rahte haiñ

ki jin ko raushnī kī lau ruḳh-e-bātil se miltī hai

mujhe zinda jalā.e tujh ko bhī zinda hī dafnā.e

mire qātil kī fitrat bhī tire qātil se miltī hai

chakorī dekh le tū bhuul jaa.e chāñd ko taknā

dil-e-muztar ko jo taskīn kaale til se miltī hai

ye donoñ juḌvāñ bhaa.ī haiñ nahīñ is meñ shub.h kyūñki

mire mansab kī sūrat bhī mire qātil se miltī hai

kisī attār se milnā to 'panchhī' hai bahut mushkil

jo dil-āvez ḳhushbū husn kī mahfil se miltī hai

taDapne ki ijazat jazba-e-bismil se milti hai

jo dil mushtaq ho to phir zara mushkil se milti hai

wo haq sach ki ibarat paDhne se mahrum rahte hain

ki jin ko raushni ki lau ruKH-e-baatil se milti hai

mujhe zinda jalae tujh ko bhi zinda hi dafnae

mere qatil ki fitrat bhi tere qatil se milti hai

chakori dekh le tu bhul jae chand ko takna

dil-e-muztar ko jo taskin kale til se milti hai

ye donon juDwan bhai hain nahin is mein shubh kyunki

mere mansab ki surat bhi mere qatil se milti hai

kisi attar se milna to 'panchhi' hai bahut mushkil

jo dil-awez KHushbu husn ki mahfil se milti hai