taDapti bijliyon se tira-samani nahin jati

taḌaptī bijliyoñ se tīra-sāmānī nahīñ jaatī

chaman is tarah ujḌā hai ki vīrānī nahīñ jaatī

zarūrat hai kisī muusā kī phir aiman kī vaadī meñ

vo yuuñ āvāz dete haiñ ki pahchānī nahīñ jaatī

tirī tasvīr kyā dekhī ki ḳhud tasvīr ban baiThe

hamāre dīda-e-hairāñ kī hairānī nahīñ jaatī

na.e sāġhar nayā saaqī nayā andāz-e-mai-ḳhāna

qadāmat kī yahāñ ab baat kuchh maanī nahīñ jaatī

ba-juz taḳhrīb insāñ kī samajh meñ kuchh nahīñ aatā

zamīñ se is liye taḳhrīb-sāmān.ī nahīñ jaatī

ḳhushāmad kī havā meñ phuul sab chunñe lage 'sāqī'

dar-e-gulchīñ kī tum se ḳhaak bhī chhānī nahīñ jaatī

taDapti bijliyon se tira-samani nahin jati

chaman is tarah ujDa hai ki virani nahin jati

zarurat hai kisi musa ki phir aiman ki wadi mein

wo yun aawaz dete hain ki pahchani nahin jati

teri taswir kya dekhi ki KHud taswir ban baiThe

hamare dida-e-hairan ki hairani nahin jati

nae saghar naya saqi naya andaz-e-mai-KHana

qadamat ki yahan ab baat kuchh mani nahin jati

ba-juz taKHrib insan ki samajh mein kuchh nahin aata

zamin se is liye taKHrib-samani nahin jati

KHushamad ki hawa mein phul sab chunne lage 'saqi'

dar-e-gulchin ki tum se KHak bhi chhani nahin jati