tadbir-e-qarar-e-subh nahin saman-e-sukun-e-sham nahin

tadbīr-e-qarār-e-sub.h nahīñ sāmān-e-sukūn-e-shām nahīñ

kambaḳht mohabbat vāloñ ko duniyā meñ kahīñ ārām nahīñ

vo roz nahīñ vo raat nahīñ vo sub.h nahīñ vo shaam nahīñ

jab ranj nahīñ afkār nahīñ andoh nahīñ ārām nahīñ

samjhegā na koī samjhā hai asrār-e-jahān-e-fitrat ko

ye dil kī lagī vo hai jis kā āġhāz nahīñ anjām nahīñ

maġhmūm kiyā nāshād kiyā bas dil ne hameñ barbād kiyā

qismat se shikāyat koī nahīñ taqdīr pe kuchh ilzām nahīñ

vo lamha fanā kā jaan liyā paiġhām qazā kā maan liyā

jab dil meñ kisī kā dhyān nahīñ jab lab pe kisī kā naam nahīñ

ye ishq ḳhayāl-e-ḳhām sahī rusvā-e-jahāñ bad-nām sahī

kyā terā ġhurūr-o-nāz batā ai husn ḳhayāl-e-ḳhām nahīñ

taqdīr ne terā dard diyā din raat jigar kā ḳhuun piyā

duniyā meñ hamārā is ke sivā kuchh shaġhl nahīñ kuchh kaam nahīñ

TuuTe nahīñ roz-o-shab mahshar kis vaqt tire dīvānoñ par

kab terī nigah ko madd-e-nazar ushshāq kā qatl-e-ām nahīñ

behtar hai yahī ḳhud uTh jaa.e mai-ḳhāna-e-hastī se 'nāmī'

sahbā-e-mohabbat hī se agar lab-rez ye dil kā jaam nahīñ

tadbir-e-qarar-e-subh nahin saman-e-sukun-e-sham nahin

kambaKHt mohabbat walon ko duniya mein kahin aaram nahin

wo roz nahin wo raat nahin wo subh nahin wo sham nahin

jab ranj nahin afkar nahin andoh nahin aaram nahin

samjhega na koi samjha hai asrar-e-jahan-e-fitrat ko

ye dil ki lagi wo hai jis ka aaghaz nahin anjam nahin

maghmum kiya nashad kiya bas dil ne hamein barbaad kiya

qismat se shikayat koi nahin taqdir pe kuchh ilzam nahin

wo lamha fana ka jaan liya paigham qaza ka man liya

jab dil mein kisi ka dhyan nahin jab lab pe kisi ka nam nahin

ye ishq KHayal-e-KHam sahi ruswa-e-jahan bad-nam sahi

kya tera ghurur-o-naz bata ai husn KHayal-e-KHam nahin

taqdir ne tera dard diya din raat jigar ka KHun piya

duniya mein hamara is ke siwa kuchh shaghl nahin kuchh kaam nahin

TuTe nahin roz-o-shab mahshar kis waqt tere diwanon par

kab teri nigah ko madd-e-nazar ushshaq ka qatl-e-am nahin

behtar hai yahi KHud uTh jae mai-KHana-e-hasti se 'nami'

sahba-e-mohabbat hi se agar lab-rez ye dil ka jam nahin