taDpa kiya jo ye dil-e-muztar tamam raat

taḌpā kiyā jo ye dil-e-muztar tamām raat

kaaTī hai maiñ ne kyā kahūñ kyūñkar tamām raat

apne makāñ pe jab mah-e-paikar nahīñ milā

phirtā rahā raqīboñ ke ghar ghar tamām raat

laḌ kar jo mujh se vo sitam-ārā chalā gayā

kaaTī hai maiñ ne taare hī gin kar tamām raat

pichhle pahar se aañkh khulī be-qarār huuñ

aaya jo ḳhvāb meñ mah-e-anvar tamām raat

apne makāñ se us ne nikālā jo raat ko

le kar phirā maiñ kāñdhe pe bistar tamām raat

is dard-e-dil se maiñ jo karāhā kiyā dilā

bechain mere saath banā ghar tamām raat

furqat meñ merī zindagī dushvār ho ga.ī

maiñ karvaTeñ badaltā huuñ din bhar tamām raat

kyūñkar na naaz apne muqaddar pe ho haqīr

dekhā jo ḳhvāb-e-sāqī-e-kausar tamām raat

taDpa kiya jo ye dil-e-muztar tamam raat

kaTi hai main ne kya kahun kyunkar tamam raat

apne makan pe jab mah-e-paikar nahin mila

phirta raha raqibon ke ghar ghar tamam raat

laD kar jo mujh se wo sitam-ara chala gaya

kaTi hai main ne tare hi gin kar tamam raat

pichhle pahar se aankh khuli be-qarar hun

aaya jo KHwab mein mah-e-anwar tamam raat

apne makan se us ne nikala jo raat ko

le kar phira main kandhe pe bistar tamam raat

is dard-e-dil se main jo karaha kiya dila

bechain mere sath bana ghar tamam raat

furqat mein meri zindagi dushwar ho gai

main karwaTen badalta hun din bhar tamam raat

kyunkar na naz apne muqaddar pe ho haqir

dekha jo KHwab-e-saqi-e-kausar tamam raat