tahrir hum afsana-e-gham karte rahenge

tahrīr ham afsāna-e-ġham karte raheñge

sar marhala-e-lauh-o-qalam karte raheñge

zindāñ meñ jo aa.e haiñ to chheḌeñge na.e giit

lai naġhma-e-zanjīr kī kam karte raheñge

kab tak yūñhī chhā.eñge tasavvur ke ufuq par

kab tak vo ḳhayāloñ pe karam karte raheñge

sochā hai ki bardāsht kī ḳhū Dāleñge ham bhī

hañs hañs ke talāfī-e-sitam karte raheñge

nairangī-e-māhaul pe likkheñge ġhazal bhī

aur marsiya-e-nau bhī raqam karte raheñge

hai dil meñ huzūrī kī tamanna to jabīñ ko

shā.ista-e-ādāb-e-haram karte raheñge

ham ahl-e-qalam us ko samajhte haiñ farīza

sachchā.ī ko alfāz meñ zam karte raheñge

mahsūs ye hotā hai 'ziyā' fikr ke dushman

fankār ke hāthoñ ko qalam karte raheñge

tahrir hum afsana-e-gham karte rahenge

sar marhala-e-lauh-o-qalam karte rahenge

zindan mein jo aae hain to chheDenge nae git

lai naghma-e-zanjir ki kam karte rahenge

kab tak yunhi chhaenge tasawwur ke ufuq par

kab tak wo KHayalon pe karam karte rahenge

socha hai ki bardasht ki KHu Dalenge hum bhi

hans hans ke talafi-e-sitam karte rahenge

nairangi-e-mahaul pe likkhenge ghazal bhi

aur marsiya-e-nau bhi raqam karte rahenge

hai dil mein huzuri ki tamanna to jabin ko

shaista-e-adab-e-haram karte rahenge

hum ahl-e-qalam us ko samajhte hain fariza

sachchai ko alfaz mein zam karte rahenge

mahsus ye hota hai 'ziya' fikr ke dushman

fankar ke hathon ko qalam karte rahenge