tahrir hua main kabhi taqrir hua main

tahrīr huā maiñ kabhī taqrīr huā maiñ

har sinf meñ ik shaḳhs kī tafsīr huā maiñ

iblīs ne sajda na kiyā zo'm meñ us ke

ik qasr takabbur kā jo ta.amīr huā maiñ

allah re mirī shiddat-e-ehsās kā aalam

murjhā.ī kalī koī to dil-gīr huā maiñ

is ahd meñ ye soch bhī hai jurm ke mānind

haq-goī pe kyoñ bā.is-e-tāzīr huā maiñ

pūchho na mirā haal mirā haal kahāñ hai

muddat huī ik shaḳhs kī tasvīr huā maiñ

sab khul ga.ī kirdār kī guftār kī ḳhūbī

aḳhbār ke column meñ jo tash.hīr huā maiñ

jis din se ki ik shaḳhs ne pherī haiñ nigāheñ

ranj-o-ġham-o-ālām kī jāgīr huā maiñ

is varta-e-hairat meñ zamāne se maiñ gum huuñ

kis dard kā rishta thā ki zanjīr huā maiñ

tahrir hua main kabhi taqrir hua main

har sinf mein ek shaKHs ki tafsir hua main

iblis ne sajda na kiya zo'm mein us ke

ek qasr takabbur ka jo tamir hua main

allah re meri shiddat-e-ehsas ka aalam

murjhai kali koi to dil-gir hua main

is ahd mein ye soch bhi hai jurm ke manind

haq-goi pe kyon bais-e-tazir hua main

puchho na mera haal mera haal kahan hai

muddat hui ek shaKHs ki taswir hua main

sab khul gai kirdar ki guftar ki KHubi

aKHbar ke column mein jo tashhir hua main

jis din se ki ek shaKHs ne pheri hain nigahen

ranj-o-gham-o-alam ki jagir hua main

is warta-e-hairat mein zamane se main gum hun

kis dard ka rishta tha ki zanjir hua main