tai hua hai us taraf ki rahguzar ka jagna

tai huā hai us taraf kī rahguzar kā jāgnā

mere paañv meñ kisī lambe safar kā jāgnā

bolte the kyā parinde se dar-o-dīvār par

yaad hai ab bhī mujhe vo apne ghar kā jāgnā

ab kahāñ mausam hai vo dār-o-rasan kā dosto

ab kahāñ ushshāq ke shānoñ pe sar kā jāgnā

varna mujh ko dhuup kā sahrā kabhī na chhoḌtā

aa gayā hai kaam mere ik shajar kā jāgnā

ik purānī aarzū Thahrī ujāloñ kī talab

ik purānā ḳhvāb Thahrā hai sahar kā jāgnā

āsmāñ khulte ga.e mujh par zamīnoñ kī tarah

ek lamhe ke liye thā bāl-o-par kā jāgnā

maiñ 'nabīl' is ḳhauf se ik umr soyā hī nahīñ

zindagī-bhar kā hai sonā lamha-bhar kā jāgnā

tai hua hai us taraf ki rahguzar ka jagna

mere panw mein kisi lambe safar ka jagna

bolte the kya parinde se dar-o-diwar par

yaad hai ab bhi mujhe wo apne ghar ka jagna

ab kahan mausam hai wo dar-o-rasan ka dosto

ab kahan ushshaq ke shanon pe sar ka jagna

warna mujh ko dhup ka sahra kabhi na chhoDta

aa gaya hai kaam mere ek shajar ka jagna

ek purani aarzu Thahri ujalon ki talab

ek purana KHwab Thahra hai sahar ka jagna

aasman khulte gae mujh par zaminon ki tarah

ek lamhe ke liye tha baal-o-par ka jagna

main 'nabil' is KHauf se ek umr soya hi nahin

zindagi-bhar ka hai sona lamha-bhar ka jagna