tajalliyan hain ki in ka koi hisab nahin

tajalliyāñ haiñ ki in kā koī hisāb nahīñ

nigāh-e-shauq hai aur dekhne kī taab nahīñ

junūn-e-ishq meñ ahl-e-talab se hotā hai

vo ik gunāh jo mustaujib-e-azāb nahīñ

jahāñ pe zehn hī maflūj ho ke rah jaa.e

use kuchh aur hī kahiye vo inqalāb nahīñ

samajhnā chāheñ jise aur samajh meñ aa na sake

to phir vo zindagī kyā hai agar sarāb nahīñ

karam kī phir bhī tavaqqo to hai mujhe us se

ye aur baat duā mirī mustajāb nahīñ

use to bazm hī kahnā gunāh hai 'zaidī'

vo bazm jis meñ ki saaqī nahīñ sharāb nahīñ

tajalliyan hain ki in ka koi hisab nahin

nigah-e-shauq hai aur dekhne ki tab nahin

junun-e-ishq mein ahl-e-talab se hota hai

wo ek gunah jo mustaujib-e-azab nahin

jahan pe zehn hi mafluj ho ke rah jae

use kuchh aur hi kahiye wo inqalab nahin

samajhna chahen jise aur samajh mein aa na sake

to phir wo zindagi kya hai agar sarab nahin

karam ki phir bhi tawaqqo to hai mujhe us se

ye aur baat dua meri mustajab nahin

use to bazm hi kahna gunah hai 'zaidi'

wo bazm jis mein ki saqi nahin sharab nahin