tajalliyon ko bhi andaza-e-nazar na raha

tajalliyoñ ko bhī andāza-e-nazar na rahā

kuchh e.atibār tirā jalva-e-sahar na rahā

tasavvurāt meñ bhī ab vo jalva-gar na rahā

nazar vahī hai magar hāsil-e-nazar na rahā

chaman meñ aa.ī thī kal jin ke dam-qadam se bahār

unhīñ kā aaj chaman par koī asar na rahā

luTā hai manzil-e-maqsad pe kārvāñ jab se

mirī nigāh meñ phir koī rāhbar na rahā

bahār meñ use rang-e-ḳhizāñ nazar aaya

jise bahār meñ ehsās-e-bāl-o-par na rahā

sukūn-e-dil kā ho aalam ki dard kī manzil

vo kis fazā meñ kahāñ merā ham-safar na rahā

na sham-e-bazm kā jalva na raqs-e-parvāna

sahar ke baad vo hangāma-e-sahar na rahā

guzar ga.ī bahut achchhī ġham-e-mohabbat meñ

ġham-e-hayāt kā baar apne dosh par na rahā

fareb-e-jalva ne kyā kar diyā nigāhoñ ko

ki ab nigāh meñ jalva bhī mo'atabar na rahā

naqāb ruḳh se tum apne uThā to loge magar

natīja kyā mujhe hosh-e-nazar agar na rahā

na be-ḳhudī kī fazā thī na hosh kā aalam

magar maiñ farz-e-mohabbat se be-ḳhabar na rahā

maiñ sang-e-dar se bhī ab be-niyāz huuñ 'sājid'

jabīn-e-shauq pe ehsān-e-sang-e-dar na rahā

tajalliyon ko bhi andaza-e-nazar na raha

kuchh eatibar tera jalwa-e-sahar na raha

tasawwuraat mein bhi ab wo jalwa-gar na raha

nazar wahi hai magar hasil-e-nazar na raha

chaman mein aai thi kal jin ke dam-qadam se bahaar

unhin ka aaj chaman par koi asar na raha

luTa hai manzil-e-maqsad pe karwan jab se

meri nigah mein phir koi rahbar na raha

bahaar mein use rang-e-KHizan nazar aaya

jise bahaar mein ehsas-e-baal-o-par na raha

sukun-e-dil ka ho aalam ki dard ki manzil

wo kis faza mein kahan mera ham-safar na raha

na sham-e-bazm ka jalwa na raqs-e-parwana

sahar ke baad wo hangama-e-sahar na raha

guzar gai bahut achchhi gham-e-mohabbat mein

gham-e-hayat ka bar apne dosh par na raha

fareb-e-jalwa ne kya kar diya nigahon ko

ki ab nigah mein jalwa bhi mo'atabar na raha

naqab ruKH se tum apne uTha to loge magar

natija kya mujhe hosh-e-nazar agar na raha

na be-KHudi ki faza thi na hosh ka aalam

magar main farz-e-mohabbat se be-KHabar na raha

main sang-e-dar se bhi ab be-niyaz hun 'sajid'

jabin-e-shauq pe ehsan-e-sang-e-dar na raha