tajdid ho wafa ki qarine nahin rahe

tajdīd ho vafā kī qarīne nahīñ rahe

yādoñ ke qīmtī vo ḳhazīne nahīñ rahe

jin narm rāstoñ se tū utrā thā dil meñ dost

sochoñ meñ ab vo maḳhmalī ziine nahīñ rahe

ye bandagān-e-ḳhās kā hī sirf vasf thā

ho 'ilm jin ko hazm vo siine nahīñ rahe

utrā thā ek chāñd mire dil meñ jin se ab

chāhat kī rah-guzar meñ vo ziine nahīñ rahe

tai hote the hayā se mohabbat ke marhale

ab vo mohabbatoñ meñ qarīne nahīñ rahe

kyoñ vāpsī ke tum ne vasīle jalā diye

sāhil pe lauTne ko safīne nahīñ rahe

raushan the tere naqsh-e-qadam se jo jān-e-man

āñkhoñ se dil talak vahī ziine nahīñ rahe

kyoñ 'shamsa' zindagī meñ moharram Thahar gayā

hālāñki sog ke to mahīne nahīñ rahe

tajdid ho wafa ki qarine nahin rahe

yaadon ke qimti wo KHazine nahin rahe

jin narm raston se tu utra tha dil mein dost

sochon mein ab wo maKHmali zine nahin rahe

ye bandagan-e-KHas ka hi sirf wasf tha

ho 'ilm jin ko hazm wo sine nahin rahe

utra tha ek chand mere dil mein jin se ab

chahat ki rah-guzar mein wo zine nahin rahe

tai hote the haya se mohabbat ke marhale

ab wo mohabbaton mein qarine nahin rahe

kyon wapsi ke tum ne wasile jala diye

sahil pe lauTne ko safine nahin rahe

raushan the tere naqsh-e-qadam se jo jaan-e-man

aankhon se dil talak wahi zine nahin rahe

kyon 'shamsa' zindagi mein moharram Thahar gaya

haalanki sog ke to mahine nahin rahe