tajrabon ke mausam jab sazgar aaenge

tajraboñ ke mausam jab sāzgār ā.eñge

fikr ke daraḳhtoñ meñ barg-o-bār ā.eñge

jur.ateñ uḌānoñ kī paar le ga.iiñ ham ko

ghaat meñ rahe jangal ab shikār ā.eñge

TukḌe TukḌe ummīdeñ joḌ lūñgā maiñ jis din

hañste gaate mausam ḳhud mere dvaar ā.eñge

ham ko dekhnā ye hai bojh to nahīñ jīvan

marhale to dukh sukh ke baar baar ā.eñge

phuul bante jā.eñge zaḳhm zaḳhm talvoñ se

merī raah meñ jitne ḳhār-zār ā.eñge

Duub jā niyāz ab to sath kī chamak mat dekh

tujh ko gahre paanī hī sāzgār ā.eñge

tajrabon ke mausam jab sazgar aaenge

fikr ke daraKHton mein barg-o-bar aaenge

juraten uDanon ki par le gain hum ko

ghat mein rahe jangal ab shikar aaenge

TukDe TukDe ummiden joD lunga main jis din

hanste gate mausam KHud mere dwar aaenge

hum ko dekhna ye hai bojh to nahin jiwan

marhale to dukh sukh ke bar bar aaenge

phul bante jaenge zaKHm zaKHm talwon se

meri rah mein jitne KHar-zar aaenge

Dub ja niyaz ab to sath ki chamak mat dekh

tujh ko gahre pani hi sazgar aaenge