taKHliq-e-kaenat digar kar sake to kar

taḳhlīq-e-kā.enāt digar kar sake to kar

paidā ḳhud apne shām-o-sahar kar sake to kar

phūloñ meñ shab guzārnā mushkil nahīñ koī

kāñToñ pe koī raat basar kar sake to kar

achchhā nahīñ kisī kī tamannā se khelnā

achchhā yahī hai is se hazar kar sake to kar

har ashk-e-ḳhūñ hai maḳhzan-e-sarmāya-e-hayāt

har ashk-e-ḳhūñ ko la.al-o-gohar kar sake to kar

taare marāhil-e-safar-e-shauq hī sahī

tāroñ ko bhī sharīk-e-safar kar sake to kar

aql-o-ḳhirad ke marhale tai kar liye to kyā

vahm-o-gumāñ ke ma.arke sar kar sake to kar

'fārūq' ye bahār-e-chaman phir na aa.egī

yārān-e-mai-kada ko ḳhabar kar sake to kar

taKHliq-e-kaenat digar kar sake to kar

paida KHud apne sham-o-sahar kar sake to kar

phulon mein shab guzarna mushkil nahin koi

kanTon pe koi raat basar kar sake to kar

achchha nahin kisi ki tamanna se khelna

achchha yahi hai is se hazar kar sake to kar

har ashk-e-KHun hai maKHzan-e-sarmaya-e-hayat

har ashk-e-KHun ko lal-o-gohar kar sake to kar

tare marahil-e-safar-e-shauq hi sahi

taron ko bhi sharik-e-safar kar sake to kar

aql-o-KHirad ke marhale tai kar liye to kya

wahm-o-guman ke marke sar kar sake to kar

'faruq' ye bahaar-e-chaman phir na aaegi

yaran-e-mai-kada ko KHabar kar sake to kar