talash-e-rahbar na KHauf-e-mazil na fikr koi hai jism-o-jaan ki

talāsh-e-rahbar na ḳhauf-e-mazil na fikr koī hai jism-o-jāñ kī

junūñ salāmat to kis ko parvā rahe vafā ke har imtihāñ kī

jo tum ne dekhā hai muskurā kar qadam zamāne ke ruk ga.e haiñ

us ik nigāh-e-karam se pahle kahāñ thī mujh par nazar jahāñ kī

bayān garche thā dard dil kā magar thā kaif-o-asar se ḳhālī

jo naam aayā hai us meñ terā baḌhī hai lazzat bhī dāstāñ kī

ravish pe mahv-e-ḳhirām ho kar jagā.e kyā kyā na tum ne jaadū

kalī meñ rañgat guloñ meñ nik.hat na zīnat aisī thī gulsitāñ kī

jamāl-e-jānāñ kī jalva-gāheñ jahāñ bhī jā.ūñ vahāñ pe pā.ūñ

jhukā.ūñ sar ko jahāñ bhī apne vahīñ pe chaukhaT hai āstāñ kī

kabhī na insāñ ke dil meñ jhāñkā kabhī na khodā ḳhazāna-e-dil

zamīñ ke ruḳh se haTā.e parde to baat kī ham ne āsmāñ kī

zarūr ā.eñgī phir bahāreñ chaman meñ phir raqs-o-rañg hogā

na bād-e-sar-sar ke hoñge jhoñke na yūrisheñ hoñgī phir ḳhizāñ kī

ye jāntā huuñ ki us kā muddat se tinkā tinkā bikhar rahā hai

na jaane phir kyoñ ye yaad paiham hai mere ujḌe se āshiyāñ kī

jo aarzū ko 'habīb' puḳhta to qurb-o-dūrī kā farq kaisā

mire tasavvur ne ḳhatm kar dī jo duurī ham meñ thī darmiyāñ kī

talash-e-rahbar na KHauf-e-mazil na fikr koi hai jism-o-jaan ki

junun salamat to kis ko parwa rahe wafa ke har imtihan ki

jo tum ne dekha hai muskura kar qadam zamane ke ruk gae hain

us ek nigah-e-karam se pahle kahan thi mujh par nazar jahan ki

bayan garche tha dard dil ka magar tha kaif-o-asar se KHali

jo nam aaya hai us mein tera baDhi hai lazzat bhi dastan ki

rawish pe mahw-e-KHiram ho kar jagae kya kya na tum ne jadu

kali mein rangat gulon mein nikhat na zinat aisi thi gulsitan ki

jamal-e-jaanan ki jalwa-gahen jahan bhi jaun wahan pe paun

jhukaun sar ko jahan bhi apne wahin pe chaukhaT hai aastan ki

kabhi na insan ke dil mein jhanka kabhi na khoda KHazana-e-dil

zamin ke ruKH se haTae parde to baat ki hum ne aasman ki

zarur aaengi phir bahaaren chaman mein phir raqs-o-rang hoga

na baad-e-sar-sar ke honge jhonke na yurishen hongi phir KHizan ki

ye jaanta hun ki us ka muddat se tinka tinka bikhar raha hai

na jaane phir kyon ye yaad paiham hai mere ujDe se aashiyan ki

jo aarzu ko 'habib' puKHta to qurb-o-duri ka farq kaisa

mere tasawwur ne KHatm kar di jo duri hum mein thi darmiyan ki