talash jis ki ho wo shai kabhi nahin milti

talāsh jis kī ho vo shai kabhī nahīñ miltī

qarār dil ko laboñ ko hañsī nahīñ miltī

bhaTakte phirte haiñ tārīk rahguzāroñ meñ

tire baġhair kahīñ raushnī nahīñ miltī

chaTaktī rahtī haiñ kaliyāñ bhī gul bhī khilte haiñ

nigāh-o-dil ko magar tāzgī nahīñ miltī

hazār shāḳheñ lachaktī haiñ mausam-e-gul meñ

shaguftagī hai magar nāzukī nahīñ miltī

riyāzatoñ se nikhartā hai koī bhī fan ho

agar shu.ūr na ho āgahī nahīñ miltī

hayāt naam hai jehd-o-amal kā ai logo

jo thak ke baiThe rahe zindagī nahīñ miltī

hamesha rahtī haiñ āñkheñ bharī bharī sī 'jamāl'

kisī ko palkoñ pe merī namī nahīñ miltī

talash jis ki ho wo shai kabhi nahin milti

qarar dil ko labon ko hansi nahin milti

bhaTakte phirte hain tarik rahguzaron mein

tere baghair kahin raushni nahin milti

chaTakti rahti hain kaliyan bhi gul bhi khilte hain

nigah-o-dil ko magar tazgi nahin milti

hazar shaKHen lachakti hain mausam-e-gul mein

shaguftagi hai magar nazuki nahin milti

riyazaton se nikharta hai koi bhi fan ho

agar shuur na ho aagahi nahin milti

hayat nam hai jehd-o-amal ka ai logo

jo thak ke baiThe rahe zindagi nahin milti

hamesha rahti hain aankhen bhari bhari si 'jamal'

kisi ko palkon pe meri nami nahin milti