talatum mein hai ab kashti kinara kis ko milta hai

talātum meñ hai ab kashtī kinārā kis ko miltā hai

jo sāhil tak pahuñch jaa.e vo dhārā kis ko miltā hai

nikalne ko bhañvar se yuuñ to kitnī kashtiyāñ niklīñ

magar ab dekhnā ye hai kinārā kis ko miltā hai

muqaddar apnā apnā hai ye qismat apnī apnī hai

na jaane un kī bāhoñ kā sahārā kis ko miltā hai

bahāreñ phuul taare chāñdnī rāteñ hasīñ manzar

chale aao ye mauqa phir dobāra kis ko miltā hai

tirī mahfil meñ dekheñ aaj rusvā kaun hotā hai

bharī mahfil se uThne kā ishāra kis ko miltā hai

umīdeñ le kar aa.e haiñ na jaane kitne parvāne

magar jalne kā dekheñ ab ishāra kis ko miltā hai

ḳhushī kī halkī chhāñv meñ guzar mumkin nahīñ 'tishna'

alam ke gahre saa.e se kināra kis ko miltā hai

talatum mein hai ab kashti kinara kis ko milta hai

jo sahil tak pahunch jae wo dhaara kis ko milta hai

nikalne ko bhanwar se yun to kitni kashtiyan niklin

magar ab dekhna ye hai kinara kis ko milta hai

muqaddar apna apna hai ye qismat apni apni hai

na jaane un ki bahon ka sahaara kis ko milta hai

bahaaren phul tare chandni raaten hasin manzar

chale aao ye mauqa phir dobara kis ko milta hai

teri mahfil mein dekhen aaj ruswa kaun hota hai

bhari mahfil se uThne ka ishaara kis ko milta hai

umiden le kar aae hain na jaane kitne parwane

magar jalne ka dekhen ab ishaara kis ko milta hai

KHushi ki halki chhanw mein guzar mumkin nahin 'tishna'

alam ke gahre sae se kinara kis ko milta hai