talab kiya hai hamein waqt ne talab ki tarah

talab kiyā hai hameñ vaqt ne talab kī tarah

na.e mizāj kī sūrat na.e adab kī tarah

badal chukī hai zamāne meñ ye to sab kī tarah

hayāt apnī guzāro na be-adab kī tarah

ḳhudā gavāh ki ab aap maat khā.eñge

kisī tarah se bhī dījegā aap ab kī tarah

kisī kī raat hai raushan na.e charāġhoñ se

hamārā din hai abhī tak siyāh shab kī tarah

kisī kī chashm se sairāb ho ke piitā huuñ

dikhā.ī detā huuñ duniyā ko tishna-lab kī tarah

ye vāqi.a hai ki tabdīliyoñ kā haamī huuñ

mirā mizāj badaltā hai roz-o-shab kī tarah

hazār kahne ko us ne ḳhudā banā Daale

misāl de nahīñ paayā vo mere rab kī tarah

ḳhudā ne mujh ko navāzā hai apnī rahmat se

mujhe samajhiye na 'mahmūd' aap sab kī tarah

talab kiya hai hamein waqt ne talab ki tarah

nae mizaj ki surat nae adab ki tarah

badal chuki hai zamane mein ye to sab ki tarah

hayat apni guzaro na be-adab ki tarah

KHuda gawah ki ab aap mat khaenge

kisi tarah se bhi dijega aap ab ki tarah

kisi ki raat hai raushan nae charaghon se

hamara din hai abhi tak siyah shab ki tarah

kisi ki chashm se sairab ho ke pita hun

dikhai deta hun duniya ko tishna-lab ki tarah

ye waqia hai ki tabdiliyon ka hami hun

mera mizaj badalta hai roz-o-shab ki tarah

hazar kahne ko us ne KHuda bana Dale

misal de nahin paya wo mere rab ki tarah

KHuda ne mujh ko nawaza hai apni rahmat se

mujhe samajhiye na 'mahmud' aap sab ki tarah