talKH lahja jis ki fitrat hai usi nari ka bojh

talḳh lahja jis kī fitrat hai usī naarī kā bojh

maiñ uThā.e phir rahā huuñ ziist bechārī kā bojh

kaTghare meñ adl kī ḳhātir khaḌā hai be-qusūr

Dho rahā hai ek bebas kab se lāchārī kā bojh

is liye pal bhar ko maiñ sotā nahīñ ārām se

le ke sotā huuñ hamesha sar pe bedārī kā bojh

zindagī kaise guzārūñ maiñ to ik mazdūr huuñ

ik taraf beTī kī shādī us pe bīmārī kā bojh

us ko āñkhoñ ne nahīñ dekhā to yuuñ lagtā rahā

jaise āñkhoñ ke saroñ par ho jafā-kārī kā bojh

aur mat rakkho mire kāñdhoñ pe zimmedāriyāñ

pahle hī kuchh kam nahīñ hai roTī tarkārī kā bojh

tajarbe ke saath kījiye misra-e-sānī qubūl

sab se bhārī hai to hai duniyā meñ ḳhuddārī kā bojh

bār-e-fan Dhone kī tāqat de vagarna ai karīm

nā-tavāñ kaise uThā saktā hai fankārī kā bojh

bādshāh-e-vaqt haiñ be-fikr aur tāhir-'sa.ūd'

naujavāñ dil par liye phirte haiñ bekārī kā bojh

talKH lahja jis ki fitrat hai usi nari ka bojh

main uThae phir raha hun zist bechaari ka bojh

kaTghare mein adl ki KHatir khaDa hai be-qusur

Dho raha hai ek bebas kab se lachaari ka bojh

is liye pal bhar ko main sota nahin aaram se

le ke sota hun hamesha sar pe bedari ka bojh

zindagi kaise guzarun main to ek mazdur hun

ek taraf beTi ki shadi us pe bimari ka bojh

us ko aankhon ne nahin dekha to yun lagta raha

jaise aankhon ke saron par ho jafa-kari ka bojh

aur mat rakkho mere kandhon pe zimmedariyan

pahle hi kuchh kam nahin hai roTi tarkari ka bojh

tajarbe ke sath kijiye misra-e-sani qubul

sab se bhaari hai to hai duniya mein KHuddari ka bojh

bar-e-fan Dhone ki taqat de wagarna ai karim

na-tawan kaise uTha sakta hai fankari ka bojh

baadshah-e-waqt hain be-fikr aur tahir-'saud'

naujawan dil par liye phirte hain bekari ka bojh